ОХУ Ялалтын баярын жагсаалыг сүүлийн 20 жилийн хугацаанд анх удаа зэвсэг техникгүйгээр зохион байгуулах гэж байна. 

Тодруулбал Дэлхийн хоёрдугаар дайнд Нацист Германы ялагдлыг тэмдэглэдэг уламжлалтай энэхүү жагсаал ирэх долоо хоногт болно. 

Энэ нь жил бүрийн тавдугаар сарын 9-нд тэмдэглэдэг хамгийн чухал баяруудын нэг бөгөөд Улаан талбай дээр цэргийн жагсаал, техник, зэвсэг үзүүлдэг уламжлалтай. 

Харин энэ жил буюу сүүлийн бараг 20 жилийн хугацаанд анх удаа ямар ч зэвсэг техник жагсаалд оролцуулахгүй болж байна. 

ОХУ-ын талаас үүнийг "Украины террорист үйл ажиллагаа” гэж тодорхойлсон эрсдэлээс шалтгаалсан шийдвэр хэмээн тайлбарлав. 

Сүүлийн саруудад Украины халдлагууд Москвагийн хойд хэсэгт орших Усть-Луга боомт, Казахстаны хил орчмын Самара муж, Уралын нуруунд байрлах Пермийн бүс зэрэг Оросын гүн дэх бүсүүдэд хүрчээ.

Улмаар аюул заналхийллийг багасгахын тулд бүх арга хэмжээг авч байна гэв. 

Гэсэн ч баярын жагсаалд “Цэргийн дээд боловсролын байгууллагуудын алба хаагчид болон Зэвсэгт хүчний зарим салбарын төлөөлөл оролцож, уламжлалт байдлаар цэргийн нисэх хүчний үзүүлбэр болно" гэж Батлан хамгаалахын яам мэдэгдсэн байна.

Кремль энэхүү жагсаалыг цэргийн хүч чадал, олон улсын нөлөөгөө харуулах хэрэгсэл болгон ашигладаг бөгөөд энэ нь үндэсний бахархлын нэг хэсэг байсаар ирсэн.

2008 оноос хойш Улаан талбайд болсон Ялалтын баярын жагсаал бүрт цэргийн техник, төрөл бүрийн зэвсгийг тогтмол үзүүлж ирсэн. Мөн Санкт-Петербург зэрэг бусад хотуудад ч жижиг хэмжээний жагсаалууд зохион байгуулдаг.

Эх сурвалж: АР