УИХ-ын чуулганы пүрэв гарагийн нэгдсэн хуралдаан эхэллээ. Өнөөдрийн хуралдаанаар хэлэлцэх асуудлын тов: 

• Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төсөл /Монгол Улсын Ерөнхийлөгч 2026.03.09-ний өдөр өргөн мэдүүлсэн, хэлэлцэх эсэх, үргэлжилнэ/
• Шинжлэх ухаан, технологийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Б.Уянга нарын 3 гишүүн 2025.07.02-ны өдөр өргөн мэдүүлсэн, анхны хэлэлцүүлэг, асуулт асуух хугацаа 90 минут/
• “Тогтоолын хавсралтад нэмэлт, өөрчлөлт оруулах тухай” Улсын Их Хурлын тогтоолын төсөл /Засгийн газар  2026.03.17-ны өдөр өргөн мэдүүлсэн, хэлэлцэх эсэх, асуулт асуух хугацаа 120 минут/
• Бусад

Ерөнхий сайд Н.Учралын өгсөн хүсэлтийн дагуу Засгийн газраас өргөн барьсан 2025 оны 12-р сарын 30-ны өдөр өргөн мэдүүлсэн

• Татварын ерөнхий хуульд өөрчлөлт оруулах тухай,
• Аж ахуйн нэгжлийн орлогын албан татварын тухай хуульд нэмэлт, өөрчлөлт оруулах тухай, 
• Хувь хүний орлогын албан татварын тухай хуульд нэмэлт, өөрчлөлт оруулах тухай, 
• Нэмэгдсэн өртгийн албан татварын тухай хуульд нэмэлт өөрчлөлт оруулах тухай хуулийн төслүүдийг татан авлаа. 

Өнгөрсөн долоо хоногт УИХ дахь АН-ын бүлэг хуулийн төсөлтэй холбоотой нэг өдрийн завсарлага авсан бөгөөд бүлгийн дарга дараах мэдээллийг өглөө. 

УИХ дахь АН-ын бүлгийн дарга О.Цогтгэрэл: Бид тал талаас нь удаа дараа ярилцсан. Нэгдсэн байр суурь бол хуулийн зарим заалт Үндсэн хуулийн заалтыг зөрчсөн байх үндэслэлтэй байна. Хэлэлцэх эсэхийг дэмжээд явц дунд засах байр суурийг зарим гишүүн илэрхийлсэн. Хэмжиж болохгүй ёс зүй гэдгээр УИХ-ын гишүүнийг эгүүлэн татах нь ард түмний төлөөллийн мандатыг улс төрийн шүүхээр хэлэлцэх хаалгыг нээж байгаа тул хэлэлцүүлгийн явцад засах боломжгүй гэж байр сууриа илэрхийлсэн гишүүд олон байлаа. АН-ын үндсэн үзэл баримтлал нь тусгаар тогтнол, үндэсний язгуур эрх ашгийг үндэслэн, ардчилсан ёс, парламентын засаглалыг бэхжүүлэх, дархлааг хангах гэдэг.

Ерөнхийлөгчийн өргөн мэдүүлсэн хуулийн төслийг хэлэлцэх эсэх санал хураалт эхэлж, чуулганы хуралдаанд оролцсон 101 гишүүний 57 нь дэмжсэнээр  хуулийн төслийг хэлэлцэх нь зүйтэй хэмээн дэмжлээ. Хуулийн төслийг анхны хэлэлцүүлэгт бэлтгүүлэхээр холбогдох байнгын хороонд шилжүүллээ. 

Чуулганы нэгдсэн хуралдааны үеэр энэхүү санал хураалтыг эсэргүүцэж байгаа гишүүд үгээ хэлсээр байна. Тэд УИХ-ын даргыг чиглүүлсэн, манифуляц хийж байна хэмээж байна. УИХ-ын дарга С.Бямбацогт "Хуулийн төслийг хэлэлцэх явцад засаж сайжруулах боломж бий. Бид парламентаараа хуулийн төслийг батлах эсэхийг шийддэг шүү дээ" хэмээн индэр дээрээс хэлэв.