Мобиком Корпораци дэлхийн тэргүүлэгч технологийн компани Huawei Consumer Business Group-ийн “Top 100 Global Core Partners” шагналыг хүртэж, олон улсын түвшинд шилдэг түнш байгууллагуудын нэгээр үнэлэгдлээ.

Энэхүү шагнал нь Huawei CBG-ийн дэлхий даяарх стратегийн түнш байгууллагуудаас хамтын ажиллагааны үр дүн, зах зээлд үзүүлсэн нөлөө, хэрэглэгчдэд хүргэсэн үнэ цэнээрээ онцгойрсон байгууллагуудад олгогддог юм.

2026 онд Мобиком Корпораци Монгол Улсыг төлөөлөн уг жагсаалтад багтсан нь Huawei болон Мобикомын урт хугацааны стратегийн түншлэл, технологийн шинэчлэл, инновацлаг бүтээгдэхүүн үйлчилгээг Монголын хэрэглэгчдэд хүргэж буй хамтын ажиллагааны бодит үр дүнг олон улсын түвшинд үнэлсэн хэрэг боллоо.

Мобиком Корпораци нь Telco-оос TechCo болох стратегийн хүрээнд харилцаа холбооны суурь үйлчилгээнээс гадна ухаалаг төхөөрөмж, дижитал технологи, инновацлаг шийдлүүдийг хэрэглэгчдэд ойртуулах чиглэлд олон улсын тэргүүлэх технологийн компаниудтай хамтын ажиллагаагаа өргөжүүлсээр байна.

Huawei-ийн энэ жилийн шагналын цом нь “Advancing Together, Co-creating the Future” буюу “Хамтдаа хөгжин, ирээдүйг хамтдаа бүтээе” гэсэн үзэл санааг илэрхийлсэн бөгөөд Huawei болон түүний түншүүдийн харилцан итгэлцэл, хамтын өсөлт, ирээдүйг хамтран бүтээх зорилгыг бэлгэдсэн өвөрмөц загвартайгаар бүтээгдсэн байна.

Мобиком Корпораци цаашид ч дэлхийн технологийн түншүүдтэй хамтын ажиллагаагаа бэхжүүлж, Монголын хэрэглэгчдэд дэвшилтэт технологи, чанартай бүтээгдэхүүн, үйлчилгээг хүргэхийн төлөө ажиллах болно.