АНУ-ын ерөнхийлөгч Дональд Трамп Израил, Ираны талууд 12 хоног үргэлжилсэн зэвсэгт мөргөлдөөнөө зогсоож, бүрэн хэмжээний гал зогсоох хэлэлцээр хэрэгжиж эхлэхээр болсныг зарлалаа.

Энэ мэдэгдлийн өмнө Ираны тал АНУ-ын довтолгооны хариу болгож, Катар дахь АНУ-ын цэргийн баазад довтолсон юм.

Ираны талаас гал зогсоох хэлэлцээрийг зөвшөөрсөн гэдгийг баталсан ч Израилын талаас одоогоор албан ёсны тайлбар хийгээгүй байна.

Цагаан ордны мэдээллээр Трамп Израилын Ерөнхий сайд Бенжамин Нетаньяхутай утсаар ярьж, уг хэлэлцээрийг зуучилсан гэнэ. 

Энэ талаар Трамп гал зогсоох хэлэлцээрийг шат дараатайгаар зохион байгуулахаа мэдэгдээд талуудын хоорондох мөргөлдөөнийг "дайн" хэмээн нэрлэсэн.

Тэрбээр өөрийн цахим хуудастаа "Бүх зүйл төлөвлөсний дагуу болно гэдэгт итгэлтэй байна. Израил, Иран талууд 12 хоног үргэлжилсэн дайныг зогсоосонд баяр хүргэе.

Энэ дайн хэдэн жил ч үргэлжилж, Ойрх дорнодыг тэр чигт нь сүйрүүлж болох байсан. Гэхдээ тэгээгүй, хэзээ ч тэгэхгүй. Иран, Израил, Ойрх дорнод, АНУ, дэлхийг бурхан ивээг" хэмээн бичжээ.

Израил улс Ираны цөмийн хөтөлбөрийг эсэргүүцэж, тус улсын нутаг дэвсгэрт довтолсон. Үүний хариуг Ираны талаас мөн барьсан бөгөөд талууд харилцан нэгэн рүүгээ довтолсоор байв. 

Харин өнгөрсөн амралтын өдөр АНУ Ираны нутаг дэвсгэр дэх цөмийн гурван гол байгууламжийг бөмбөгдсөн юм. Трампын энэ үйлдлийг хууль ёсны байсан эсэхэд АНУ-ын улс төрчид эргэлзэж буй. 

Эх сурвалж: Reuters