Энэ оны гуравдугаар сард АНУ-д оршин суудаг Эль Сальвадорын иргэн, 29 настай Килмар Абрего Гарсиаг албадан гаргасан.

Түүний эхнэр АНУ-ын Мэрилэнд мужийн иргэн бөгөөд тус залууг АНУ-д оршин суух эрхтэй байсан ч андуурч албадан гаргасан гэж үзэж байв.

Тодруулбал Цагаан ордон түүнийг олон улсын зохион байгуулалттай МS-13 гэмт бүлэглэлийн гишүүн гэж буруутгаж байгаа ч түүний өмгөөлөгч үүнийг эрс няцааж байгаа юм.

Түүнийг Эль Сальвадорын “террористуудын хорих төв” рүү шилжүүлсэн бөгөөд АНУ-д буцаан авчрах боломжгүй гэж байв.

Гэсэн ч баасан гарагт түүнийг хууль бус цагаачдыг дотооддоо тээвэрлэдэг байсан гэх гэмт хэрэгт холбогдуулан шүүхийн тулд АНУ-д эргэн авчирчээ.

Түүний шүүх хурал энэ сарын 13-нд товлогдсон бөгөөд гэм буруутай нь тогтоогдвол АНУ-д ял эдлүүлсний дараа Эль Сальвадор руу буцаах аж. Шүүх хурал хүртэл тэрбээр холбооны хорих ангид хоригдоно. 

Гарсиаг Эль Сальвадорт хоригдож байх хугацаанд нь Мэрилэнд мужийн сенатч өөрийн биеэр очиж уулзаж байв. Мэрилэндийн шүүгч 2019 онд түүнийг албадан гаргахаас хамгаалах шүүхийн шийдвэр гаргасан. Харин үүнийг нь Трамп зөрчсөн гэж үзэж байгаа юм. 

Уг иргэнийг албадан гаргасны дараа олон хүн шийдвэрийг эсэргүүцэж, хүний эрхийг зөрчсөн хэмээн шүүмжилж байв.

Эх сурвалж: Reuters