Эдийн засгийн форум Төрийн ордонд үргэлжилж байна. Энэ үеэр Монголбанкны ерөнхий эдийн засагч Д.Ган-Очир мэдээлэл өглөө. 

-Мөнгөний бодлогын хорооноос бодлогын хүүг 11 хувь хэвээр үлдээх шийдвэр гаргасан үндэслэлийн талаар тайлбарлахгүй юу?
-Нэгдүгээрт, одоогийн макро эдийн засаг, санхүүгийн нөхцөл байдлыг харгалзаж үзсэн. Хоёрдугаарт, инфляц цаашид яаж өөрчлөгдөх төлөвтэй байгааг судалж үзсэн. Бидний одоогийн төсөөллөөр эдийн засгийн сэргэлт бол үргэлжилнэ. Гэхдээ хөдөө аж ахуйн салбар, ялангуяа зудын нөхцөл байдалтай холбоотойгоор эдийн засгийн өсөлт одоо байгаа 7.8 хувиас 5 хувь руу унах нөхцөл байдал үүсэж магадгүй байна.

Мэдээж гадаад нөхцөл байдлын эрсдэлүүдийг ман харгалзан үзэж байгаа. Тухайлбал хэрэглээний зээл, цалин, тэтгэврийн өсөлт, хувийн болон төрийн байгууллагуудын ногдол ашгийн өсөлт зэрэг нь өрхийн хэрэглээг маш хурдтай өсгөж байна. 

Өөрөөр хэлбэл цалин, тэтгэвэр зэргийн өсөлт нь хэрэглээний зээл авах орон зайг бий болгож байна гэсэн үг юм. 

Хэрэглээний зээл хэт өндөр байх нь өрхийн санхүүгийн дарамтыг нэмэгдүүлэх бөгөөд энэ нь санхүүгийн системд эрсдэл бий болгоно. Нөгөө талдаа импортоор дамжин макро эдийн засгийн тогтвортой өсөлт буюу сэргэлтийг удаан байлгахгүй унагах эрсдэл байгаа юм. 

Үүнээс сэргийлэхийн тулд өр орлогын харьцаа гэдэг үзүүлэлтийг 2019 оноос хойш хэрэглэж байна. Үүнийг 60 байсныг 5 функтээр бууруулж, 55 хувь болгосон. Нэг ёсондоо сард төлдөг төлбөр нь тухайн сард олж буй орлогынхоо 55 хувиас хэтрэх ёсгүй гэж хязгаарласан гэсэн үг. Ингэснээр хэрэглээний зээлийн өсөлт саарах болов уу гэсэн таамаг байна.

Ингэхдээ хоёр зээлийг хэрэглээний зээлийн өр орлогын харьцаанд оруулахгүй байхаар тооцсон. Нэг нь картын зээл. Энэ нь олон дүнтэй, тэр дундаа амьжиргааны баталгаажих доод түвшин хүртэл зээлийн хязгаартай байх учир энэ төрлийн зээлд өр орлогын харьцааг тооцохгүй. Учир нь энэ санхүүгийн бүтээгдэхүүний хувьд шинэлэг бөгөөд тодорхой хугацаандаа төлөөд явахад санхүүгийн дарамт бага байдаг төрөл юм. 

Хоёрдугаарт, сургалтын төлбөрийн зээлүүд. Боловсрол эзэмших, түүнийгээ ашиглаад өсөх хөгжих гэдэг бидний зорилго учраас ийм зөв зорилготой зээлүүдэд санхүүгийн хатуу хязгаарлалт тогтоох шаардлагагүй гэж үзсэн гэлээ. 

Дэлгэрэнгүй үзэх: