ХӨСҮТ-өөс томуу ба томуу төст өвчний  нөхцөл ба улаанбурханы нөхцөл байдлын талаар мэдээлэл өгөв.

ЭМЯ-ны Нийгмийн эрүүл мэндийн газрын дарга Л.Баттөр "Улаанбурхан өвчнөөс үүдэн бага насны хүүхэд эндэх өндөр эрсдэлтэй. Иргэд цагаан сарын үеэр янз бүрийн өвчний мэдээлэл цацлаа гэх хардалттай байна. Гэвч яалт ч үгүй менингококкт, томуу төст өвчин, улаанбурхан өвчний дэгдэлт гарч байна. 

Томуу төст өвчний дэгдэлт харьцангуй гайгүй байгаа ч долоо хоногийн дараа цагаан сарын баяр болно. Эдгээр өвчний дэгдэлт нэмэгдэж магадгүй учир иргэд урьдчилсан сэргийлэх шаардлагатай байна. Улаанбурханы өвчний тохиолдол батлагдсан үед амны хаалтыг тогтмол зүүхийг иргэддээ уриалж байна.

Улаанбурханы өвчлөл дэгдэлт хэлбэрээр бүртгэгдэж буй Вьетнам улсад аялсан өгүүлэмжтэй улаанбурхан өвчний 3 дах тохиолдол лабораториор батлагдсан. Тус улсаас Улаанбаатар чиглэлийн шууд нислэгт 230 зорчигч байсан. Эдгээр хүмүүстэй холбогдож, тандан судалгааг хийж байна.

Олон улсад зөөвөрлөгдсөн тохиолдол бүртгэгдэж байгаа учир гаднын улсаас ирсэн хүн бүр сэрэмжтэй байх хэрэгтэй байна. Өндөр халуурах, тууралт гарсан шинж тэмдэг илэрвэл өөрийгөө тусгаарлах шаардлагатай. 230 зорчигч дунд вакцинд хамрагдаагүй бага насны хүүхэд, насанд хүрээгүй хүмүүс байсан. Батлагдсан 3 хүн Вьетнам, Малайз зэрэг олон улсад аялсан өгүүлэмжтэй байна" гэлээ.

Улаанбурхан өвчин гэж юу вэ?

Улаан бурхан өвчин нь вирусээр үүсгэгддэг цочмог халдварт өвчин юм. Агаар дуслын замаар буюу халдвартай хүн ханиаж найтаах төдийд маш амархан халдварлана. Уг өвчнөөр бага насны хүүхэд өвдсөн тохиолдолд хүндрэх, эндэх эрсдэл өндөр байдаг.

Улаанбурхан өвчин аюултай юу?

Халдварт  өвчин  дотроос  халдварлах чадавхиараа хамгийн өндөрт ордог өвчний нэг бөгөөд халдварлалтын индекс нь 96-98% юм. Улаанбурханаар өвдсөн 5 хүн тутмын 1 нь хүндрэх эрсдэлтэй. Уушгины хатгалгаа, тархины үрэвслээр хүндэрч болзошгүй бөгөөд улмаар үхэлд  хүргэх аюултай.