Жолооч нар замын хөдөлгөөний дүрэм зөрчвөл Зөрчлийн тухай хуулиар хариуцлага тооцдог. Зөрчлийн тухай хуульд 2023 оны 12-р сарын 7-ны өдөр оруулсан нэмэлт, өөрчлөлтөөр замын хөдөлгөөний дүрэм зөрчсөн үйлдлүүдэд торгууль оногдуулахдаа дараах зохицуулалтуудыг шинэчилсэн байна. Уг хуулийн 3.4 дүгээр зүйл буюу Торгох шийтгэлд:

• Зөрчил үйлдсэн хүн, хуулийн этгээд Замын хөдөлгөөний аюулгүй байдлын тухай хууль, түүнд нийцүүлэн гаргасан захиргааны хэм хэмжээний акт зөрчсөнтэй холбогдуулан эрх бүхий этгээдээс оногдуулсан торгох шийтгэлийг хуульд заасан хугацаанд биелүүлээгүй бол тээврийн хэрэгсэл жолоодох эрхийн үнэмлэх авах, сунгах, ангилал нэмэх, өөрчлөх, нөхөн авах, тээврийн хэрэгслийн эзэмшлийн шилжилт хөдөлгөөн хийх эрхийг хязгаарлана.
• Хүн, хуулийн этгээд эрх бүхий этгээдээс оногдуулсан торгох шийтгэлийг хуульд заасан хугацаанд биелүүлээгүй бол шийтгэлийн хэмжээг 50 хүртэл хувиар нэмэгдүүлнэ.
• Уг шийтгэлийг хуульд заасан хугацаанд биелүүлээгүй бол цагдаагийн алба хаагч тээврийн хэрэгслийн хөдөлгөөнийг торгох шийтгэлийг биелүүлж дуусах хүртэл хугацаанд хязгаарлана. Энэ тохиолдолд тээврийн хэрэгслийг хуульд заасан журмын дагуу тусгай талбайд хүргэх, эсхүл холбогдох хууль тогтоомжид заасан бусад аргаар хөдөлгөөнийг нь хязгаарлана.

3.5 дугаар зүйл.Торгох шийтгэлийн хэмжээг хөнгөрүүлэх, нэмэгдүүлэх үндэслэл

1.Зөрчил үйлдсэн хүн, хуулийн этгээд нь эрх бүхий албан тушаалтан, шүүхээс оногдуулсан торгох шийтгэлийг хуулиар тогтоосон хугацаанд биелүүлэх бол шийтгэлийн хэмжээг 50 хувиар хөнгөрүүлнэ.

4.Эрх бүхий албан тушаалтнаас оногдуулсан торгох шийтгэлийг энэ хуульд заасан хугацаанд биелүүлээгүй бол шийтгэлийн хэмжээг 50 хүртэл хувиар нэмэгдүүлнэ.

Жишээ нь, урсгал сөрсөн жолоочийг 50 мянган төгрөгөөр торгодог. Энэ зөрчлийг баталгаажуулсан торгуулийн мэдэгдэх хуудас гарсан өдрөөс хойш 14 хоногийн дотор төлөх ёстой. Хэрэв та 50 мянган төгрөгийн торгуулийг 15 хоногийн дотор төлбөл 50 хувь хөнгөлнө. Хугацаандаа төлөхгүй бол торгуулийг 50 хувиар нэмэгдүүлж, 75 мянган төгрөг төлөх хуулийн зохицуулалт 2025 оны нэгдүгээр сарын 1-нээс хэрэгжиж эхэллээ.

Зөрчил үйлдсэн хүн торгох шийтгэлийг хуульд заасан хугацаанд биелүүлээгүй бол шүүхээс тогтоосон нийтийн ашиг сонирхолд тустай ажлыг цалин хөлс олгохгүйгээр хийлгэхийг нийтэд тустай ажил хийлгэх шийтгэл гэнэ. Шүүх нийтэд тустай ажил хийлгэх шийтгэлийг өдөрт наймаас дээшгүй цагаар, нийт 240-720 цагаар тогтооно.

Торгох шийтгэлийг биелүүлээгүй бол торгох шийтгэлийн 15 нэгжийг найман цагийн нийтэд тустай ажил хийлгэх шийтгэлээр тооцож солино.