Монголбанкны Мөнгөний бодлогын хороо зургаадугаар сарын 15-ны өдөр хуралдсан. Хурлаас тэтгэврийн зээлийн өр орлогын харьцааг 50:50 болгох шийдвэр гарсан юм. УИХ-ын гишүүн Ц.Идэрбат энэ шийдвэрээ эргэж харах асуудлыг УИХ дахь Нийгмийн бодлогын байнгын хорооны хурлын үеэр хөндсөн. Тус хорооноос Монголбанканд албан бичиг хүргүүлжээ. Мөн УИХ-ын Нийгмийн бодлогын байнгын хороогоор ирэх долоо хоногт тэтгэврийн зээлийн нөхцөл, тэтгэврийн зээлийн хүүг бууруулахаар авч хэрэгжүүлэх төлөвлөгөө байгаа эсэх, хэрхэн хэрэгжүүлэх талаар танилцуулга сонсох аж.

УИХ-ын гишүүн Ц.Идэрбат “УИХ-ын чуулганы завсарлагаар орон нутагт ажиллах үеэр ахмадууд энэ асуудлыг их ярьсан, уулзалт бүр дээр л хэлсэн.  

Монгол банкны Мөнгөний бодлогын хорооноос тэтгэврийг ахмадууд өөртөө зарцуулахгүй  байна, тухайн тэтгэвэр авагч амьжиргааны баталгаажих доод түвшний орлоготой байх ёстой гэдэг үндэслэлээр өр орлогын харьцааг 50:50 болгох шийдвэр гаргасан. Өөрөөр хэлбэл 470,000 төгрөгийн босго тавиад, үлдсэн 200,000 төгрөгийг жилийн хугацаатай өгөхөөр болсон. Гэтэл энэ нь амьдралд нийцэхгүй байна гэдэг асуудлыг ахмадууд ярьсан. Тиймээс байнгын хороо, чуулганы хуралдааны үеэр энэ асуудлыг нэлээд хэлж, ярилаа” гэв.