16, 32 настай хоёр хүнийг хэрцгийгээр хөнөөсөн гэмт хэрэг гараад хоёр жил өнгөрч байна. Хэрэг үйлдсэн, хамтран оролцсон байж болзошгүй этгээдүүдийн гэм буруугийн шүүх хурал өчигдөр (2026.01.22) Баянгол, Хан-Уул, Сонгинохайрхан дүүргийн эрүүгийн хэргийн анхан шатны тойргийн шүүхэд болж, өнөөдөр /2026.01.23/ шийдвэрээ танилцуулх гэж байна.

Насанд хүрээгүй хохирогч, гэрчийн эрх, хууль ёсны ашиг сонирхлыг хамгаалах зорилгоор гэм буруугийн шүүх хуралдааныг хаалттай явуулав.

Прокурорын байгууллагаас:

• Яллагдагч Ц.Д-г 2024 онд 2 удаагийн үйлдлээр хүнийг алах, мөн заналхийлэх, залилах гэмт хэргийг байнга үйлдэж амьдралын эх үүсвэр болгосон, арван зургаан насанд хүрээгүй хүнтэй бэлгийн харилцаанд орсон, эд хөрөнгө устгах, гэмтээх гэмт хэрэгт,
• Яллагдагч Э.Н, Э.Г нарыг хүнийг алах гэмт хэрэгт хамжигчаар,
• Өсвөр насны яллагдагч Х.Э-г арван зургаан насанд хүрээгүй хүнтэй бэлгийн харилцаанд орох гэмт хэргийг үйлдэхэд хамжигчаар тус тус оролцсон гэж прокуророос яллах дүгнэлт үйлдэж шүүхэд шилжүүлсэн юм.

ШҮҮХИЙН ШИЙДВЭР:

• Шүүгдэгч Э.Номин-Эрдэнэ, Э.Ган-Эрдэнэ нарыг Эрүүгийн хуулийн ерөнхий ангийн 3.1-р зүйлийн 5, 3.5-р зүйлийн 1 дэх хэсэгт заасныг тус тус журамлан, мөн хуулийн тусгай ангийн 11-р зүйлийн 2 дахь хэсгийн 2.1, 2.7, 2.11 дэх хэсэгт зааснаар яллах дүгнэлт үйлдэж ирүүлснийг Эрүүгийн хэргийг хянан шийдвэрлэх тухай хуулийн 34, 19-р зүйлийн 1 дэх хэсгийн 1.1 дэх заалтад зааснаар гэмт хэргийн шинжгүй үндэслэлээр хэргийг хэрэгсэхгүй болгож, тэдгээрийг цагаатгасуй.
• НПГ-аас шүүгдэгч Х.Энхсайханыг яллах дүгнэлт үйлдэж ирүүлснийг гэмт хэргийн  шинжгүй үндэслэлээр хэргийг хэрэгсэхгүй болгож, тэдгээрийг цагаатгасуй. 

Шүүгдэгч Ц.Дагвадоржийг: 

• Онц харгис хэрцгийгээр өөртөө эдийн ашигтай байдал бий болгох, хохирогчийг биеэ хамгаалж чадахгүй мэдсээр байж, хоёр хүнийг алах гэмт хэрэг үйлдсэн гэм буруутай,
• 16 насанд хүрээгүй хүнтэй бэлгийн харьцаанд орсон гэмт хэрэг үйлдсэн гэм буруутай,
• Бусдыг тодорхой үйлдэл хийхийг шаардаж өөрт нь хүч хэрэглэхийг заналхийлсэн гэмт хэрэг үйлдсэн гэм буруутай,
• Бусдыг хуурч бодит байдлыг нуух замаар залилах гэмт хэрэг үйлдсэн хүндрүүлэх нөхцөл байдалтай буюу байнга үйлдэж амьдралын эх үүсвэр болгосон гэмт хэрэг үйлдсэн гэм буруутай,
• Бусдын эд хөрөнгийг хууль бусаар устгаж, гэмтээснээс бага хэмжээнээс дээш хохирол учруулсан гэмт хэрэг үйлдсэн гэм буруутай,
• Кибер орчинд хууль бусаар халдаж, мэдээллийг ашиглах боломжгүй боломжгүй болгосон гэмт хэрэг үйлдсэн гэм буруутайд тооцож хаалттай хорих ангид бүх насаар нь хорих ял оноолоо.