Зэвсэгт хүчний хуурай замын цэргийн командлагч, хошууч генерал Ч.Цогтжаргал Япон улсад албан ёсны айлчлал хийв.

Монгол Улсын Зэвсэгт хүчний Хуурай замын цэргийн командлагч хошууч генерал Ч.Цогтжаргал Япон Улсын Хуурай замын цэргийн Өөрийгөө хамгаалах хүчний командлагч генерал Ясүнори Моришитагийн урилгаар Япон Улсад албан ёсны айлчлал хийж байна. Айлчлалын хүрээнд хошууч генерал Ч.Цогтжаргал, генерал Ясүнори Моришита нар 06 дугаар сарын 05-ны өдөр хэлэлцээ хийв.

Талууд Монгол, Японы Батлан хамгаалах яамд хооронд 2024 онд шинэчлэн байгуулсан “Батлан хамгаалах салбарт хамтран ажиллах санамж бичиг”-ийн хүрээнд хоёр улсын Хуурай замын цэргийн командлалуудын хамтын ажиллагаа өргөжин хөгжиж, Зэвсэгт хүчний харилцаанд чухал байр суурийг эзэлж байгааг нотлов. 

2014 оноос хойш өнгөрсөн 10 жилд хоёр улсын Хуурай замын цэргийн командлалуудын инженерийн цэргүүдийн хамтарсан “Зам”сургууль үндсэн гурван хөтөлбөрийг амжилттай хэрэгжүүлж дууссан. Энэ нь батлан хамгаалах салбарын хамтын ажиллагаа гүнзгийрэхэд чухал ач холбогдолтой болсныг сайшаав.

Энэхүү сургууль нь 2025 оноос шинэ шатны хөтөлбөр болон хэрэгжиж, “НҮБ-ын энхийг дэмжих ажиллагааны цэргийн бааз байгуулах сургалт” сэдвийн хүрээнд “ажиллагааны газар орон дахь цэргийн баазын зураг, төсөл боловсруулах, баазын барилга байгууламж, инженерийн болон дэд бүтцийн байгууламжуудыг барих онолын сургалт” Япон Улсын Хуурай замын өөрийгөө хамгаалах хүчний харьяа Инженерийн сургуулийн материаллаг баазыг түшиглэн амжилттай зохион байгуулагдаж буйг онцлон тэмдэглэв.

Мөн хошууч генерал Ч.Цогтжаргал Япон Улсын Хуурай замын өөрийгөө хамгаалах хүчний командлалын харьяа Инженерийн сургуульд зочлон үйл ажиллагаатай танилцав.

Тус сургуулийн материаллаг баазыг түшиглэн зохион байгуулагдаж буй хоёр улсын инженерийн цэргүүдийн хамтарсан “Зам” сургуульд оролцож буй Монгол Улсын Зэвсэгт хүчний бие бүрэлдэхүүнтэй уулзаж, сургуулийн үйл явцтай танилцжээ.