Өнгөрч буй энэ долоо хоногт хэн, юу хэлэв? Хаана, юу болов?  Товчлон тоймлов. 

ШИНЭ СТАНЦЫН ЧИМЭЭ- Төв аймгийн Сэргэлэн суманд станц барьж байна



Жил бүрийн өвөл суурин газрын иргэд цахилгааны хязгаарлалтад өртдөг. Бөөрөлжүүтийн цахилгаан станц ашиглалтад орж, энэ жил харанхуй гудманд бэдрэхгүй нь хэмээн баярлаж байтал I сарын 20-ны өглөө ДЦС-4-ийн наймдугаар зууханд гэмтэл гарав. 
 
Тус зуухыг салгаснаар төвийн бүсийн эрчим хүчний систем чадлын дутагдалд орж, цахилгааны хязгаарлалт 14 хоног үргэлжиллээ. Ирэх өвөл энэ аюул мөн л давтагдах уу гэж олон хүн асууж, түгшиж байна. Тэгвэл Сэргэлэн дэд станцын гүйцэтгэл 92 хувьтай үргэлжилж байна.

Тус станцын бүтээн байгуулалтын хүрээнд 100 МВт нарны хавтан, 90 МВт батарей хуримтлуурын станц барина. Улаанбаатар хотоос энэ сард багтааж эцсийн гүйцэтгэгчийг шалгаруулна гэж хотын удирдлагууд танилцуулав. Ерөнхий сайд Г.Занданшатар станцын ажилтай энэ сарын 3-нд танилцлаа.           

Жеффри Эпштэйн ба Монголын улс төрчидтэй холбоотой баримтуудыг он цагийн дарааллаар танилцуулав

АНУ-ын Хууль зүйн яам бэлгийн хүчирхийлэл үйлдсэн Жеффри Эпштэйний хэрэгтэй холбоотой олон мянган баримтыг цахим хуудастаа байршуулж, нийтэд ил болгосон. 

Эдгээр баримтын дунд Монгол Улстай холбоотой зарим нэрс дурдагдсан нь анхаарал татав. Гэхдээ бэлгийн хүчирхийллийн гэмт хэрэгт холбогдсон баримт байхгүй бөгөөд гол төлөв эдийн засаг, улс төрийн асуудлаар харилцаж байсан аж. Эпштэйн нь нөлөө бүхий эдийн засагч, санхүүч байсан. 

АНУ-ын Хууль зүйн яамны цахим хуудсанд буй файлын сангаас Монгол гэсэн үгээр хайхад нийт 870 /давхардсан тоогоор/ илэрц байна. 

САНАЛ БОЛГОХ ЯРИЛЦЛАГУУД

Орон сууц, нийтийн аж ахуйн удирдах газар (ОСНААУГ) Улаанбаатарын оршин суугч,  хэрэглэгчдийг дулааны эрчим хүч, хэрэгцээний халуун, хүйтэн усаар хангадаг. Мөн  бохир усыг татан зайлуулах үйлчилгээг  24 цагийн турш тасралтгүй найдвартай үзүүлдэг.  

ОСНААУГ-ын Санхүү, эдийн засгийн хэлтсийн дарга Б.Батдэлгэртэй ярилцлаа. Тэрээр ус, дулааны төлбөрийг олон жил нэмээгүй тул ОСНААУГ-ын үйл ажиллагааг хэвийн явуулахад хүндрэлтэй болсныг онцлов.  

Ус, дулааны үйлчилгээний төлбөр нь ОСНААУГ-ын үндсэн үйл ажиллагааны өртгийг нөхдөггүй. Мөн 2019 оноос хойш ус, дулаан хэрэглэгчийн тоо 50 хувиар өсөн, тус газрын ачаалал нэмэгдсэн. Гэхдээ ажилчдын тоо нь нэмэгдээгүй гэсэн юм.   

Т.Тэлмэн: МИАТ олон улсын зах зээлээс орлого олдог, бие даасан, татаас авдаггүй компани

 
МИАТ компанийн шинэ гүйцэтгэх захирал Т.Тэлмэнтэй компанийн одоогийн нөхцөл байдал, IPO, ойрын хугацааны төлөвлөгөөнийх нь талаар дэлгэрэнгүй ярилцав. Тэрээр энэ албан тушаалын сонгон шалгаруулалтад орж өрсөлдөн, ажлаа аваад хоёр сар болох гэж байна.

Монголын нэрийн хуудас болсон, үндэсний далбааг тээвэрлэгч тус компанийг ирэх жилүүдэд удирдах Т.Тэлмэн захирлын анхны ярилцлагаас түүний ажлын арга барил, өнгөрсөн хугацаанд амжилтад хүргэсэн төслүүд болон МИАТ-ын  IPO-г хэрхэн хийх төлөвлөгөөнийх нь талаар унших боломжтой. 

З.Дагдан: Нийслэлийн цэвэр усны шугамын талаас илүү нь 25-аас дээш жилийн насжилттай болсон

Усны салбарын онцлог, өнөөгийн нөхцөл байдал, дэд бүтцийн хөгжлийн талаар ОСНААУГ-ын Инженерийн бодлого төлөвлөлтийн хэлтсийн дарга З.Дагдантай ярилцлаа. Тэрээр "Халаалт доголддог хэд хэдэн шалтгаан бий. Айлуудын инженерийн шугам сүлжээ зэвэрсэн, муудсан байж болно. Турба хоолойн нүх нарийсан бөглөрдөг. Халаалт залгахаас өмнө шугам сүлжээг угаагаагүй бол мөн асуудал үүсдэг.Бид нийслэлийн төвийн 6 дүүргийн орон сууцан доорх 1500 км урт шугам сүлжээг хариуцдаг.

Үүний 600 нь халаалтын, 900 нь цэвэр усны шугам. Цэвэр усны шугамын 58 хувь нь 25-аас дээш жилийн насжилттай болсон гэв.  

САНАЛ БОЛГОХ НИЙТЛЭЛ 

Өнгөө алдаж навсайсан, хотын өнгө төрхөд сөргөөр нөлөөлөх байруудыг нураах нь зөв. Гэвч нэг асуудлыг шийдэх гээд нөгөө асуудлыг дагуулах вий. Дахин төлөвлөлтийн дагуу орон сууц барих зөвшөөрөл олгохдоо тухайн хорооны сургууль, цэцэрлэг, өрхийн эмнэлгийн ачааллыг тооцоолсон уу?  

Баянгол дүүргийн хоёрдугаар хороонд хуучнаар “Есөн шар” гэж нэрлэсэн байруудыг нураан, суурин дээр нь барьсан эхний байр ашиглалтад оржээ. Хоёр дахь байр тун удахгүй дуусахаар харагдана.  

Тус хороонд улсын нэг сургууль, нэг цэцэрлэг бий. Тэдгээрийн удирдлагуудтай уулзаж, одоо хэдэн хүүхэдтэй ажиллаж байгаа, цаашид хүүхдийн тоог нэмэх боломжтой, эсэхийг тодруулав.  

Сурвалжилга: Буяны хөсгийн замаар...

Хэн нэгэн, хэзээ нэг цагт энэ замаар явсан, эсвэл явах байх, магадгүй би ч гэсэн. Харин тэр өдөр хол байгаасай, болбол битгий ирээсэй. Учир нь энэ бол буяны хөсгийн араас уй гашууд автсан хүмүүсийг дайсан автомашинуудын урт цуваа үргэлжилдэг зам.

Өнөөдөр буяны цуваагаар биш ч ажлын машинаар Улаанбаатар хотоос зүүн тийш 68 километрийн зайд, Төв аймгийн Сэргэлэн сумын нутагт байрлах “Баргилт” хэмээх газрыг зорьж явна. Гэхдээ буяныг бодож явлаа. Замд гарсны зорилго Монголд чандарлаж оршуулах үйл ажиллагааг хэрхэн гүйцэтгэж байна вэ? Сэтгүүлч Г.Тэгшсүрэнгийн бичсэн нийтлэлийн үргэлжлэлийг эндээс уншина уу.  

ХҮНИЙ ТҮҮХ: Аавынхаа амлалтаар овоглож, амжилтаар нь замнасан Олимпын шүүгч



1965 он. Английн Манчестер хотноо болсон чөлөөт бөхийн дэлхийн аварга шалгаруулах тэмцээнийг Монголын баг тамирчид зорин очжээ. Шигшээ багийн дасгалжуулагч О.Цэрэндагва тамирчдадаа хандаж, "Энэ тэмцээнд хэн сайн барилдана, удахгүй төрөх хүүхдээ тэр хүний нэрээр нэрлэнэ" хэмээн амласан гэдэг.

Дэлхийн дэвжээнээс Монголын анхны шагналт байрыг Гавьяат тамирчин Д.Сэрээтэр хүртэж, зургаадугаар сарын 9-нд баг, тамирчид нутаг буцлаа. Маргааш нь буюу 10-ны өдөр О.Цэрэндагва дасгалжуулагчийн ууган хүү мэндэлж, Сэрээтэр хэмээх нэрийг бэлэгшээн хайрласан аж.

Бэлгэдэлт нэрийн эзэн хожим их спортод замнасан аавынхаа гавьяа, алдрыг үргэлжлүүлж, Гавьяат дасгалжуулагч, Олимпын зэрэглэлийн шүүгч болон дэлхийн дэвжээг дэнслэх учиртай байж.

...Жимс ногоо алагласан, нов ногоон, эртний соёлт Киев хотын гудмаар залуухан хархүү алхаж явна. В.Г.Пиштолов, А.Н.Шихранов, В.А.Шахов нарын домогт багш нарын удирдлага дор Киевийн Биеийн тамирын дээд сургуульд суралцаж буй өндөр шар залуу болбоос нэрт дасгалжуулагч О.Цэрэндагвын том хүү Сэрээтэр юм. Түүний түүхийг сэтгүүлч О.Батхишиг хүүрнэн өгүүлэв.   

ТӨСӨЛ: Олон эх үүсвэрээс тэтгэвэр авах боломжийг нээх Хувийн нэмэлт тэтгэврийн тухай хууль

Гэр бүл, хөдөлмөр, нийгмийн хамгааллын яамнаас Хувийн нэмэлт тэтгэврийн тухай хуулийн төслийг боловсруулж, Засгийн газраар хэлэлцүүлээд, УИХ-ын хаврын чуулганаар өргөн барихад бэлэн болжээ. Ажил хөдөлмөр эрхэлж буй иргэд өнөөдөр мөрдөгдөж буй хуулийн дагуу нийгмийн даатгалын шимтгэлээ төлнө. Харин ирээдүйд орлогоо нэмэгдүүлж, Хувийн нэмэлт тэтгэврийн сангаас тэтгэвэр авахыг хүсвэл сайн дураараа төлж болох шимтгэл юм.

Манай улсад өндөр цалинтай томоохон компаниуд энэ тогтолцоог нэвтрүүлж эхэлсэн бөгөөд одоогоор 160 мянган иргэн 70 гаруй тэрбум төгрөгийг Хувийн нэмэлт тэтгэврийн санд хуримтлуулаад буй аж. Хувийн тэтгэврийн хэд хэдэн сайн байгуулагдаж, даатгуулагчдын төлсөн шимтгэлийг хөрөнгийн менежментийн компаниудаар удирдуулж, сангийн хөрөнгийг арвижуулж байна. Хуулийн төслийн талаарх мэдээг эндээс уншаарай.