БНХАУ-ын буцалтгүй тусламжаар “Ногоон нуур 1008 айлын орон сууцны төслийг хэрэгжүүлж буй. Энэ нь Улаанбаатар хотын гэр хорооллын дахин төлөвлөлтийн орон сууцны бүтээн байгуулалт юм.

Төслийн гэрээг Монгол талаас БХБЯ болон БНХАУ-ын Бугат хотын Засгийн газар хооронд 2019 онд байгуулжээ. Эл төслийн хүрээнд Сүхбаатар дүүргийн 9-р хорооны нутаг дэвсгэрт буюу өмнө Ногоон нуур байсан сууринд орон сууц барьж байгаа юм. Нийт 21 давхар 8 блок бүхий 1008 айлын орон сууцны барилга байгууламжийн баригдах бөгөөд Барилга угсралтын ажил өнгөрсөн оны зургаан сард шав тавьж үйл ажиллагаа эхэлсэн. Барилгын гүйцэтгэл 45 хувийн биелэлттэй байна.

Барилга, хот байгуулалтын сайд Ц.Даваасүрэн тус барилгын ажилтай өнөөдөр танилцлаа. Тэрбээр “Ковид-19 цар тахлын улмаас барилгын ажил жил гаруйн хугацаанд саатсан. Гэхдээ хамтран гүйцэтгэгч талаас сайн ажиллаж барилгын гүйцэтгэлийн сайн хийж байна. Мөн аюулгүй байдлын үүднээс барилга барих үеийн хамгаалалт тор, бэхэлгээ хийсэн нь манайд байгаагүй шинэ технологи байна.

Цаашид барилгын материалыг гаднаас татан авах тээвэр, ложистик ажил удаашралтай байгаад яамны зүгээс түргэсгэх байдлаар дэмжинэ.

Энэ төсөл нь гэр хорооллын дахин төлөвлөлтийн жишиг орон сууц тул төлөвлөсөн хугацаанд ашиглалтад оруулахад анхаарах шаардлагатай. Учир нь дараагийн орон сууцны төсөл хэрэгжихэд, талбайгаа чөлөөлсөн өрхүүдийг энэ төслийн байрт түр хугацаагаар байлгах юм. Харин орон сууц баригдаж дуусахад буцаан шилжүүлэх байдлаар гэр хорооллыг орон сууц болгох буюу хотын дахин төлөвлөлтийг зохион байгуулах юм.

Мөн 2041 он хүртэл нийслэлийн дэд, бүтэц, байгуулалтын чиглэлд хийх ажлын төлөвлөгөөг ирэх намар танилцуулна” гэв.

Эл төслийн гэрээнд зааснаар 30 сарын хугацаанд барилга барьж дуусгах аж.

Одоогоор:
•    1-р блок дээр 10-р давхрын хучилтын арматурыг угсарч байна.  
•    2-р блок дээр10-р давхрын хана, хучилтын хэв хашмал, арматурын ажил хийгдэж байна.  
•    3-р блок дээр 7-р давхрын ханын арматурчлал эхлэж байна.  
•    4-р блок дээр 9-р давхрын далд багана болон ханын арматурчлал, хэв хашмалын ажил хийгдэж байна.  
•    5-р блок дээр 8-р давхрын хучилтын 1 ба 2-р үеийн арматурын ажил, хэв хашмалын бэхэлгээ хийгдэж эхэлсэн байна.  
•    6-р блок дээр 9-р блокийн хучилтын хэв хашмал, арматурын ажил хийгдэж байна.  
•    7-р блок дээр 5-р давхрын далд баганын арматурын, тэг тэнхлэг татах ажил хийгдэж байна.  
•    8-р блок дээр 10-р давхрын далд багана, ханын арматурчлалын ажил хийж буй аж.

Төслийн нэр: “Ногоон нуур 1008 айлын орон сууц” төсөл
Захиалагч: МУ-ын Засгийн газар, Барилга, хот байгуулалтын яам
Гүйцэтгэгч: БНХАУ-ын “Хятадын хоёр дахь Металлурги групп корпораци” ХХК
ТЭЗҮ, зураг төслийн гүйцэтгэгч: “Интеллект тауэр” ХХК
Хяналт: Төсөл хэрэгжүүлэх нэгж
Хугацаа: 2022 оны 06 дугаар сарын 15-наас 2024 оны 12 дугаар сарын 25-ны өдөр /2020 оны 12 дугаар сарын 11-ний өдрийн 2020/317 дугаар Ажил гүйцэтгэх гэрээ/
Төсөл хэрэгжих талбай: 4.17 га
Барилгын үндсэн хийц:  Цутгамал төмөр бетон, зоорьтой 21 давхар 8 блок.
Төлөвлөлт: Давхартаа 49.95, 55.04мкв хоёр өрөө бүхий 6 айл, Нийт 1008 айлын орон сууц.
Төсөл хэрэгжих хугацаа: Барилгын ажил эхэлснээс хойш 30 сарын хугацаанд хэрэгжинэ.  
Бусад: Хорооллын доторх авто зам, ил далд авто зогсоол, ногоон байгууламж, гадна төвлөрсөн инженерийн шугам сүлжээ бүхий цогцолбор хороолол юм.