Орон сууц, нийтийн аж ахуйн удирдах газар (ОСНААУГ) Улаанбаатарын оршин суугч,  хэрэглэгчдийг дулааны эрчим хүч, хэрэгцээний халуун, хүйтэн усаар хангадаг. Мөн  бохир усыг татан зайлуулах үйлчилгээг  24 цагийн турш тасралтгүй, найдвартай үзүүлж байна. ОСНААУГ-ын Хэрэглэгчдэд үйлчлэх төв 2-ын (ХҮТ) ахлах инженер М.Даариймаатай ярилцлаа. 

-Та ярилцлагын эхэнд ХҮТ-ийн ахлах инженерүүд ямар ажил хийдгийг танилцуулна уу?
 -Бид өглөө бүр шуурхай хурал хийдэг. Энэ хурлаар өнгөрсөн 24 цагт манай төвд ямар дуудлага ирсэн, тэр бүрийг хэрхэн засварлаж, шийдвэрлэсэн талаараа ярилцаж хэлэлцдэг.  

Дуудлага гомдол улирал, сараар ялгаатай байдаг. Зарим сард их, заримдаа бага гэх мэт. Тухайлбал Цагаан сарын өмнө өрхүүд угаалга, цэвэрлэгээгээ хийдэг тул усны хэрэглээ ихсэж, улмаар усны даралт унах тохиолдол гардаг. Үүнийг тухай бүрд нь тохируулах шаардлагатай. Бид шугам сүлжээг байнга хянаж, аль болох хэрэглэгчдийн усыг хязгаарлахгүй байхад анхаардаг. 

Хэрэглэгчид үйлчлэх төв 2 нь Баянзүрх дүүргийн 4, 7, 14, 30, 41, 41-р хороог хариуцан ажилладаг. 14 болон 15-р хороолол хамаардаг юм. Нийт 10100 өрхөд үйлчилж байна.  

-Орон сууц шинэ, хуучин байхаас хамаарч гэмтэл нь өөр өөр байх уу? 
-Тэгнэ. Таван давхар угсармал болон есөн давхар орон сууцнуудын зарим нь дундын эзэмшлийн шугам сүлжээгээ сольсон. Зарим нь солиогүй. Тэдгээр нь гэмтэх нь их. 

 
-Хэрэглэгчээс хамаарсан гэмтлүүд их гардаг уу? 
-Шугам сүлжээний насжилтаас үүддэг. Бид ил хэсгийн шугам хоолойг хянаад хэрэглэгчдэд хэзээ солих, ямар материал орох зэргийг зөвлөөд өдрөө тохирон сольдог. Харин хана таазны завсрын шугамууд далд тул хянахад хэцүү.  

-Хэрэглэгчид үйлчлэх төв гэхээр хэрэглэгчээс ирүүлсэн гомдол саналыг шийдвэрлэдэг үү?   
-Манай дээр ихэвчлэн халаалт, ус алдах, тоолуур, бохиртой холбоотой, худаг халилаа гэх мэт дуудлагууд ирдэг. Бид дуудлагаа ангилаад дийлэнхийг нь тухайн өдөрт нь шийдвэрлэхээр хичээдэг. Гэхдээ завсар дундаа гэмтэлтэй байвал хугацаа шаардана. 

Үүнийг засвар үйлчилгээний хэсэгтээ шилжүүлж, 24 цагийн дотор шийдвэрлэнэ. Хэрэглэгчийн дуудлагыг 24 цаг тасралтгүй авч байна. Дөрвөн ээлжийн операторууд ажилладаг. Манай байгууллагад одоо 63 хүн ажиллаж байна.  
 
-Өвөл халаалт доголдвол энэ төрлийн дуудлагыг түрүүлж барагдуулна гэх мэт зохицуулалт хийх үү? 
-Тэгнэ. Гадна агаарын температураас хамаарч дулааны тохируулгыг өдөр бүр хийдэг. -35 градус хүрч хүйтэрвэл дулаанаа нэмдэг юм.      

-Манай улсад хэчнээн хувийн контор ажиллаж байна вэ?  Эдгээрт нийт хэчнээн хүн ажилладаг вэ?  
-60 орчим бий. Хот суурины усан хангамж, ариутгах татуургын ашиглалт, үйлчилгээг зохицуулах хороо эдгээрт тусгай зөвшөөрөл олгодог. Хувийн контоорууд голдуу шинэ байруудын ус, дулааныг түгээж байна. Барилгын компаниуд барилгаа бариад, ямар контоорт хүлээлгэж өгснөөс хамаардаг. 

Иргэд контоорынхоо үйлчилгээнд сэтгэл ханамжгүй байвал Хот суурины усан хангамж, ариутгах татуургын ашиглалт, үйлчилгээг зохицуулах хороонд мэдэгдэж болно.  

-Контоорууд иргэдэд хүргэдэг үйлчилгээний төлбөрөө өөрсдөө тогтоодог уу. Та бүхэн үнэд хяналт тавьдаг уу? 
-Хот суурины усан хангамж, ариутгах татуургын ашиглалт, үйлчилгээг зохицуулах хороо үнэ тарифыг  тогтоодог.   

Дулаан болон халуун усны үнийг Эрчим хүчний зохицуулах хороо тогтоож байна. Улаанбаатар хотод орон нутгийн болон хувийн контоорууд бүгд ижил тарифаар үйлчилдэг. Харин Дархан, Эрдэнэтэд өөр үнэ мөрддөг. 

-Ус тасрах, зэвтэй ус гарах гэх мэт тохиолдлуудад бид хамгийн түрүүнд контоор руугаа холбогддог. Таны бодлоор контоорууд устай холбоотой ажил үйлчилгээгээ сайн гүйцэтгэж байна уу? 
-Бид хувийн контооруудад хяналт тавьдаггүй. Иргэд контоорынхоо үйлчилгээнд сэтгэл ханамжгүй байвал Хот суурины усан хангамж, ариутгах татуургын ашиглалт, үйлчилгээг зохицуулах хороонд мэдэгдэж болно.  

-Цахилгааны төлбөрийг УБЦТС-аас шууд иргэн рүү нэхэмжлэх илгээдэг. Харин усны төлбөрийн мэдээллийг буюу тоолуурын заалтыг иргэдээс, өрхүүдээс цуглуулах гэж конторын ажилчид айлуудаар явж, цаг алддаг. Цахилгааны төлбөр шиг автоматжуулах боломжтой юу? 
-Борлуулалтын байцаагч нар өрхүүдээс тоолуурын заалт авдаг. Biller.ub.kontor.mn цахим хуудсыг хөгжүүлж байна. Айл болгонд нэвтрэх нэр, код бий. Үүгээр нэвтэрч, халаалт болон ус нь хэдэн төгрөг гарсан зэрэг дэлгэрэнгүй мэдээллийг авах боломжтой. Удахгүй энэ сайт руу айлууд тоолуурын заалтаа оруулах боломжтой болно.

Ингэснээр айлуудаар явж, заалт асуудаггүй болно. Манай салбарын нийт айлын тал нь энэ сайтыг хэрэглээд хэвшлээ. Одоохондоо бүрэн хэвшил болоогүй тул бид айлууд руу сард хоёр удаа мэдээлэл илгээдэг.  

Айлуудын хаалган дээр мэдэгдэл нааж байгааг зогсоох боломжгүй. Учир нь мэдэгдлээ хүлээдэг, авсны дараа төлдөг өрхүүд бий. 

-Заалт авахын тулд танай ажилчид зарим айлын пааран доогуур мөлхөж, хүнд нөхцөлд ажилладаг гэсэн. Яагаад тэр вэ? 
-Барилгын компаниудад нэгдсэн стандарт байхгүйтэй холбоотой. Уг нь гэр дотор биш, орцонд байвал бидний ажлыг их хөнгөвчилнө. Тоолуурын заалт авахад чөлөөтэй байх, үзэгдэх орчинд тавих ёстой. Яг хаана гэдгийг нарийн заагаагүй.  
 
Зарим байранд А4 бичгийн цаасны хэмжээтэй хайрцагт тоолуураа хийдэг. Заалт харахад асуудалгүй ч гэмтэл гарвал хайрцгийг эвдэнэ. Гар багтахааргүй, жижиг хайрцагт тоолуураа хийчихдэг. Заримдаа айлын ханыг нураадаг. Эргээд хэн нь засах уу гээд асуудал үүсдэг юм. Гэвч улс алдан, доод айл руу орсон бол засахаас өөр аргагүй.  

Тааруухан СӨХ бол энэ шугамаа (гараажийн дээгүүрх эсвэл подвол дох хэвтээ чиглэлийн шугамууд) засдаггүй. Эдгээрийн хаалт арматур ажиллахгүй бол дор нь солих хэрэгтэй.

-Усыг хүн бүр хэрэглэдэг. Та төгсгөлд нь хэрэглэгчдэд хандан ямар зөвлөгөө өгөх вэ? 
-Байр авахдаа хүн бүр насжилтыг нь  хардаг. Мөн ус, дулаан нь хаанаас ирдэг, шугам сүлжээнийх нь талаар ашиглагч байгууллагаас асуугаарай. СӨХ-ийн үйл ажиллагаа нь сайн уу гэдгийг ч асуух хэрэгтэй. Учир нь тухайн байрны дундын эзэмшлийн шугам сүлжээг СӨХ хариуцдаг.

Тааруухан СӨХ бол энэ шугамаа (гараажийн дээгүүрх эсвэл подвол дох хэвтээ чиглэлийн шугамууд) засдаггүй. Эдгээрийн хаалт арматур ажиллахгүй бол дор нь солих хэрэгтэй. Сайн ажилладаг СӨХ-үүд бидний ажилд их дэм болдог.    

Энэ онд хийх их болон урсгал засварын төлөвлөгөөгөө бид дээд байгууллагадаа явуулсан. Батлахаар нь, хавраас засварын ажлууд эхэлнэ. Элэгдлийн зардлаар засвараа хийдэг. Хэрэглэгчдээс засварын төлбөр авдаггүй. Бидний хариуцдаг 10 мянган айл 150 байранд амьдарч байна. Үүний 30-40 хувьд жил бүр засвар хийдэг. Өнгөрсөн оны засварын нийт дүн 130 орчим сая төгрөг байсан.  

Иргэд аваарын хаалтыг хаавал яах вэ зэргийг мэддэг байх хэрэгтэй. Ус алдахад оршин суугч хамгийн түрүүнд аваарын хаалтаа хаагаарай. Орон сууцны тухай, СӨХ-ийн тухай хуулиудыг уншсан байвал сайн.   

-Дэлгэрэнгүй мэдээлэл өгсөнд баярлалаа. Танд ажлын амжилт хүсье.