Ерөнхий сайд Л.Оюун-Эрдэнийг огцрохыг шаардсан жагсаалаас шууд дамжуулж байна.

Ерөнхий сайд Л.Оюун-Эрдэнийг огцрохыг шаардаж буй ЦҮНХТЭЙ ЖАГСААЛ-д  оролцож буй иргэд үзэл бодлоо илэрхийлж байна.

"Ноорог"-ийн захирал О.Уламсайхан: Өөрийнхөө орлогоор 20 сая төгрөгөөр цүнх бэлэглэх, тэрбум төгрөгийн машиныг найз охиндоо бэлэглэх чадамжтай залуу монголд байхгүй.

Миний хүрээлэлд өчнөөн мундаг сургуулийг нь төгсчихсөн залуу олон бий. Тэр дунд ийм санхүүгийн чадамжтай залуу алга. Бодит байдал ийм л байна. Гадаадад хөдөлмөрлөж яваа залуус дунд ч гэсэн 22 насандаа тэрбумын хөрөнгөтэй болсон хүн байхгүй.

Бэлэг авсан охин нь эдгээр бэлгийг ааваасаа авсан гэнэ. Тэгтэл аав нь тийм их орлоготой бизнестэй юм уу гэхээр үгүй байна. Ачаа ачдаг баахан зартай. 15 ам.доллароор ачаа ачдаг хүн хүүхдэдээ тэрбум төгрөгийн үнэтэй машин авч өгдөг юм уу. Ийм үлгэр ч байхгүй. Ийм энгийн үлгэрт тархиа угаалгадаг хүмүүс бид биш.

Тэнэг хүмүүсийн тархийг угааж байгаа юм шиг PR хийсээр байгаад даварлаа. Та бүхэнд хариуцлага тооцдог "гар" байдаг юм шүү.

Улс төрчид бэнз машинаа унаж, ролекс цагаа зүүж л байдаг. Хүүхдүүд нь гадаадаар аялж байгаагаа сторидоод л. Үүнтэй нь эвлэрэх юм уу. 

Ерөнхий сайд та амаргүй, амаргүй гээд л ажлаа хийгээд байх юм. Үнэхээр амаргүй байгаа юм бол огцрох амархан. Би 17 наснаасаа эхлэн ажил эрхэлж байна. Сүүлийн гурван жил ажил хийж, бусдыг ажлын байраар ханган ажиллаж байна. Гэтэл ингэж мөнгө хураах боломж алга.

Ерөнхий сайдын хөрөнгө орлогын мэдүүлгээс харахад, хүү нь Харвардад сурах хөрөнгө алга байна. Хүү тань 20 сая төгрөгөөр найз охиндоо цүнх бэлэглэх хэмжээнд хөдөлмөр эрхлээгүй байна, орлогогүй байна. Үндэслэлгүйгээр хөрөнгөжсөн харагдаад байна. Үнэхээр бизнес эрхлээд тийм их хэмжээний хөрөнгөтэй болсон юм бол түүнийгээ нотол, иргэдэд харуул л гэж ганцхан зүйлийг залуус ярьж байна.

Хоёр дахь өдрөө жагсаж буй иргэн: Би 20 насыг туулаад гарсан. Энэ насан дээр мөнгө олох үнэхээр хэцүү гэдгийг бүгд мэднэ. Өөрийн хөдөлмөрөөр орлого бүрдүүлж, 20 гаруйхан насандаа 20 сая төгрөгийн цүнх бэлэглэнэ гэдэг хэцүү.

Ард түмэн үнэхээр ядуу байна. Татвар, цахилгаан, дулааны үнэ өсөж байна. Гэтэл нөгөө талд улстөрчид иргэдийг амьдралыг мэдэхгүй мэт тансаг амьдарч байна.

Зүгээр л одоо огцорчих оо Ерөнхий сайд аа. МАН өөрсдөө засгаа байгуул аа. АН сөрөг хүчний ажлаа хий гэдгийг шаардаж байна.

Комедиан Д.Амартүвшин: Ерөнхий сайдын хүүгийн найз охиндоо бэлэглэсэн цүнхний талаар одоо бүгд мэдэж байгаа. Залуус ганцхан зүйлийг шаардаж байгаа нь орлогоо нотол гэдэг байр суурьтай байна.

Жирийн нэг иргэний бүтэн жилийн орлоготой дүйцэх хэмжээний цүнхээр бэлэг барина гэдэг чинь юу гэсэн үг юм бэ. Орлогоо нотол! Ийм "аймар" авлигажсан нийгэмд татвар төлнө гэдэг тэнэглэл боллоо.

Иргэний үзэл бодол: Монголд шударгаар хөдөлмөрлөж байгаа иргэд улам ядуурч, унаж байна. Америк долларын ханш тэнгэрт хадаж, төгрөг элгээрээ хэвтлээ. Хувийн хэвшлийнхэнд хийх ажил олдохоо байлаа. Төрийн компаниуд нь хувийн хэвшилтэйгээ өрсөлдөөд эхэлсэн. Төр улам данхайж байна.

Иргэд амьдралын төлөө зүтгээд явж байхад Ерөнхий сайдын хүү нь мөнгөөр яаж ингэж мөнгөөр дургиж чадаж байна аа. Ерөнхий сайдын холбоо хамаарал бүхий хүмүүсийн хөрөнгө орлогын тайланг нь харахаар өнөөдрийн энэ их тансаглал байх боломжгүй юм шиг харагдаж байна.

Энэ жагсаалд ирсэн шалтгаан бол АТГ ажлаа хийж Ерөнхий сайдыг шалгаач гэж шаардаж байгаа юм. Бид нараар хэлүүлэхгүйгээр шалгалтын ажлыг эхлүүлсэн байх ёстой гэж бодож байна.