Нийслэлийн эрүүл мэндийн газрын харьяа эрүүл мэндийн байгууллагын удирдах ажилтнуудын ес дэх удаагийн шуурхай хурал Монгол-Япон эмнэлэг, АШУҮИС-д зургаадугаар сарын 2-ны өдөр боллоо. 

Энэ хурлаар Нийслэлийн эрүүл мэндийн газрын дарга, мэргэжилтнүүд АШУҮИС-ийн эмнэл зүйн ур чадварын төвтэй танилцлаа.

Хурлын гол зорилго нь нийгмийн эрүүл мэнд, тусламж үйлчилгээний туршлагаа салбар хоорондоо солилцох юм.

УИХ-ын гишүүн О.Саранчулуун, "Өвчтөн эмчлэгдээд эмнэлгээс гарахдаа өвчнөө дахин сэдрээхгүйн тулд зөвлөгөө, тусламж, үйлчилгээ авах хэрэгтэй. Олон улсын жишгээр "Үйлчлүүлэгчийг дэмжих алба" буюу нийгэм харилцааны, шим тэжээлийн болон сэтгэлзүйн зөвлөгөө өгдөг тус тусын ажилтан байна.

Гэтэл энэ үйлчилгээ манай бүх шатны эмнэлгүүдэд их дутмаг, энэ талаарх бодлогогүй, төсөв хуваарилдаггүй. Энэ тал дээр ЭМБ-ууд, улсын эмнэлгүүд ямар арга хэмжээ авах, авч байна вэ гэдгээ зөвлөлдөхөөр өнөөдрийн шуурхай хурлаа хийж байна" гэлээ.

"АШУҮИС-ийн эмнэл зүйн ур чадварын төвтэй танилцаж, шинээр бэлтгэгдэж буй эмч, мэргэжилтнүүд ямар түвшинд байна, цаашдаа юуг анхаарах талаар хэлэлцлээ. Мөн Монгол-Японы эмнэлгийн "Эрүүл мэндийг дэмжих төв"-өөс жишиг аван туршлага судаллаа" хэмээн Нийслэлийн эрүүл мэндийн дарга Х.Бат-Ирээдүй ярилаа.

Б.Ану