Нийгмийн сүлжээнд "Туулын хурдны замын төслийг өнөөдрийн Засгийн газрын хуралдаанаар зогсоолоо" хэмээн Ерөнхий сайд Н.Учрал өнөөдөр мэдээлээд байв. 

Энэ талаар Засгийн газрын хуралдаанаар хэлэлцсэн асуудлуудыг танилцуулж байх үеэр тайлбарлалаа. 

Тодруулбал, "Ерөнхий сайд болон Засгийн газарт иргэд, олон нийт, эрдэм шинжилгээний байгууллагууд, мөн улс төрийн намуудаас ирүүлж байгаа шаардлага, санал хүсэлт, гомдол, өргөдлийн мөрөөр Туулын хурдны зам төслийн талаар хэлэлцлээ.

Тус төсөлтэй холбоотойгоор олон нийтэд үүсээд байгаа бухимдал, эргэлзээ, тээнэгэлзээг арилгах хүртэл, мөн нэр холбогдож буй албан тушаалтнуудтай холбоотой асуудлыг хууль, хяналтын байгууллагаар бүрэн шийдвэрлэж дуусах хүртэл Туулын хурдны зам төслийг түр зогсоох шийдвэр гаргалаа.

Хоёрдугаарт, Засгийн газар төрөөс иргэнд чиглэсэн үйлчилгээг хүртээмжтэй, чанартай, түргэн шуурхай хүргэхэд онцгойлон анхаарч ажиллаж байна.

Энэ хүрээнд төрийн албан хаагчдад хиймлээр ажлын ачаалал үүсгэдэг тайлан, бичиг баримтыг цөөрүүлж, үндсэн ажлын цагийг нь иргэдэд үйлчлэх болон бодлого боловсруулах үйл ажиллагаанд зарцуулах боломжийг бүрдүүлэх шийдвэрүүдийг үе шаттайгаар гаргаж байна.

Энэ долоо хоногийн хуралдаанаар Хөгжлийн бодлого, төлөвлөлтийн тухай хуульд заасан тайлангуудтай холбоотой өөрчлөлтүүдийг хийлээ. Тодруулбал:

• жилд 7 удаа тайлагнадаг байсан 4 төрлийн хөгжлийн бодлогын баримт бичгийг 2 удаа болгон цөөрүүлэв.
• “Алсын хараа-2050” урт хугацааны бодлогын баримт бичгийг жил бүр үнэлдэг байсныг 5 жилд нэг удаа үнэлдэг болгов.
• Засгийн газрын үйл ажиллагааны мөрийн хөтөлбөрийг жилд 2 удаа үнэлдэг байсныг жилд 1 удаа болголоо.
• Улсын хөгжлийн жилийн төлөвлөгөөг жилд 2 удаа үнэлдэг байсныг мөн жилд 1 удаа болголоо.
• Аймаг, нийслэлийн хөгжлийн 5 жилийн үндсэн чиглэлийг жил бүр үнэлдэг байсныг 5 жилд нэг удаа үнэлэхээр өөрчиллөө.

Эдгээр шийдвэр нь УИХ-ын хяналт шалгалтын тухай хууль болон Хөгжлийн бодлого, төлөвлөлтийн тухай хуультай нийцүүлэн гарсан болно" гэв. 

ШУУД ҮЗЭХ: