УИХ-ын чуулганы /05.02/ өнөөдрийн хуралдаан эхэллээ.

Үдээс өмнөх хуралдаанд:

• Зээлийн мэдээллийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн тогтоолын төсөл /Улсын Их Хурлын гишүүн Э.Батшугар 2024.12.25-ны өдөр өргөн мэдүүлсэн, анхны хэлэлцүүлэг, үргэлжилнэ/
• Жагсаал, цуглаан хийх эрх чөлөөний тухай хууль /Шинэчилсэн найруулга/-ийн төсөл болон хамт өргөн мэдүүлсэн хуулийн төслүүд /Засгийн газар 2025.01.24-ний өдөр өргөн мэдүүлсэн, хэлэлцэх эсэх, үргэлжилнэ/
• Эрүүл мэндийн даатгалын үндэсний зөвлөлийн даатгуулагчийг төлөөлсөн гишүүнийг томилох, чөлөөлөх тухай асуудал

Үдээс хойш хуралдаанд:

• Гаалийн албан татвараас чөлөөлөх тухай хууль хүчингүй болсонд тооцох тухай хуулийн төсөл /Засгийн газар 2025.01.23-ны өдөр өргөн мэдүүлсэн, анхны хэлэлцүүлэг, асуулт, хариулт 90 минут/
• Амьтны тухай хуульд нэмэлт оруулах тухай хуулийн төсөл /Улсын Их Хурлын гишүүн О.Амгаланбаатар 2025.03.17-ны өдөр өргөн мэдүүлсэн, эцсийн хэлэлцүүлэг, асуулт, хариулт 60 минут/ -ийг тус тус хэлэлцэнэ.

"ЭМДС-НД ₮2,3 ИХ НАЯД БАЙГААГААС ₮700 ТЭРБУМЫН САНХҮҮЖИЛТ ОЛГООД БАЙНА"

Эрүүл мэндийн даатгалын үндэсний зөвлөлийн даатгуулагчийг төлөөлсөн гишүүнийг томилох, чөлөөлөх тухай асуудлыг хэлэлцэж байна.

УИХ-ын гишүүн Н.Наранбаатар:
ЭМДаатгалын санхүүжилтийн асуудал аймгуудад түгээмэл байна. Эмнэлгийн санхүүжилтэд хүрэхээргүй үнэхээр дутуу батлагдсан юм уу. Энэ талаар тодорхой мэдээлэл өгнө үү?

ЭМ-ийн сайд Т.Мөнхсайхан:
ЭМД-ын сан ковидын сан нэлээн хүндрэлтэй болсон. Эмнэлгүүдэд 300 тэрбум төгрөгийн өглөгтэй байсныгаа энэ жил барагдуулж дууссан. Сумын эрүүл мэндийн төвд шаардлагагүй хэвтэлтийг багасгаад нэг иргэн талд нь санхүүжилтийг нэмсэн. Улсын бүх сумын эмнэлгийн санхүүжилт нэмэгдсэн, гэхдээ дөрвөн төрлийн гүйцэтгэлээр олгодог санхүүжилт багассан. 

Энэ жил ЭМДСанд ₮2,3 их наяд байгаагаас эхний улиралд ₮700 тэрбумыг олгоод байна

Өөрөөр хэлбэл эмнэлэгт хэвтэх шаардлагагүй хэвтэлтэд их зардал гараад байсан, нэг иргэнд олгох санхүүжилтээ нэмж, ажилтнуудын цалинг нэмж, нэн шаардлагатай иргэнээ хэвтүүлэх юм бол илүү өгөөжөө өгнө. ЭМДСанг шаардлагагүй хэвтэлтүүдэд зарцуулж байна. Хавар болохоор ядардаг, эмнэлэгт хэвтээд дусал тариа хийлгэдэг ба үүнд ихэнх төсөв нь зарцуулагдаж, нэн шаардлагатай зүрх судасны өвчтэй, шигдээс, харвалтын үед өгөх санхүүжилт нь оны төгсгөлд байхгүй болчихдог. Үүнийг засаж залруулах ажил хийсэн. ЭМДСан дампуураагүй, хоосорсон зүйл огт байхгүй. Энэ жил ₮2,3 их наяд олгогдсон, эхний улиралд ₮700 тэрбум олгогдсон, ₮6,1 их наядын санхүүжилт үлдээд байна.

УИХ-ын гишүүн Ж.Чинбүрэн:
Эрүүл мэндийн сайд хуулиас давсан гэрээ хийчихсэн. Хөнгөлөлттэй эмийн тогтоол нь гараагүй байхад компаниудтай гэрээ хийчихсэн. Бид аль болох л эрүүл мэндийн сангаар өвчтэй иргэдийн ачааг хөнгөлье гэтэл та ингээд цөөн хэдэн компанитай өөрийн дураар гэрээ хийгээд байж болохгүй.

ЭМ-ийн сайд Л.Мөнхсайхан:
Процессийн алдаа байгаа гэж бодож байгаа бол та хууль хяналтын байгууллагад ханд л даа. Гадаадын байгууллагатай гэрээ хийж, гарын үсэг зурсан зүйл огт байхгүй. Та өөрөө манай салбарын хүн, гэтэл сошиалд энэ талаар ард иргэдэд энэ мэт буруу мэдээллийг өгөөд байна.

УИХ-ын гишүүн Ж.Чинбүрэн:
Би энэ талаар өчигдөр Улсын Ерөнхий Прокурорт өгчихсөн.

Эрүүл мэндийн даатгалын үндэсний зөвлөлийн даатгуулагчийг төлөөлсөн гишүүн С.Эрдэнэбатыг чөлөөлж, Б.Рагчааг 59,6 хувиар дэмжиж томиллоо.

Нэр дэвшигчийн ирүүлсэн баримт бичгийг хараат бус шинжээч нягталж, нэр дэвшигчтэй ганцаарчилсан ярилцлага хийсний үр дүнд Б.Рагчааг мэргэшлийн хувьд шалгуур хангахгүй ч мэдлэг, туршлага, ур чадвар, ёс зүйн хувьд шалгуур хангаж байгаа талаарх дүгнэлтээ сонсголд танилцуулсан аж.

Монгол Улсын Их Хурлын чуулганы хуралдааны дэгийн тухай хуулийн 131 дүгээр зүйлийн 131.1 дэх хэсэгт заасны дагуу нэр дэвшигчийн сонсгол явуулснаас хойш ажлын хоёр өдрийн дотор хуралдаанд оролцсон гишүүд хаалттай хуралдаж, санал нэгтэйгээр нэр дэвшигч Б.Рагчааг тухайн албан тушаалд тавигдах шаардлагыг хангасан гэж үзэн дэмжжээ.

Нэр дэвшигчийн сонсголын тайланг Улсын Их Хурлын цахим хуудаст байршуулан, Улсын Их Хурлын нийт гишүүд болон нэр дэвшигч, түүнийг санал болгосон этгээдэд хүргүүлсэн гэв.

Хэлэлцэж буй асуудалтай холбогдуулан Улсын Их Хурлын гишүүн Н.Наранбаатар, Ж.Чинбүрэн, А.Ариунзаяа, У.Отгонбаяр, С.Зулпхар, Ц.Сандаг-Очир, Д.Ганмаа, Г.Тэмүүлэн, Х.Булгантуяа, М.Бадамсүрэн нар асуулт асууж, Эрүүл мэндийн сайд болон нэр дэвшигч, ажлын хэсгийн гишүүдээс хариулт, тайлбар авав.

Хүн ам багатай, сум, зарим тосгон, сууринд эрүүл мэндийн тусламж, үйлчилгээ байгаа талаар гишүүд хөндөж байв. Сум, сууринд нарийн мэргэжлийн эмчийн үзлэг, эмнэлгийн зарим төрлийн тусламж, үйлчилгээг үзүүлэх боломж, нөхцөл хомс, хүртээмж багассан. Зарим аймгийн эмнэлэг нь тодорхой төрлийн өвчнийг оношлох, эмчлэх боломжгүй, эмчилгээ, үйлчилгээ нь доголдсон талаар гишүүд хөндөж байв. Эрүүл мэндийн даатгалын сантай холбоотой, Эмийн агентлагийн үйл ажиллагаатай холбоотой, эрх ашгийн сонирхлын зөрчилтэй асуудлуудын талаар олонтаа дурдсан. Мөн эмийн чанартай холбоотой асуудлыг хөндөж, чанартай эм, тариа, энэ төрлийн бүтээгдэхүүн авах, иргэдэд олон төрлийн сонголт хийх нөхцөл, боломжийг бүрдүүлэх шаардлагатай гэдэг байр суурийг хэлж байсан.

Ийнхүү Улсын Их Хурлын гишүүд асуулт асууж, үг хэлсний дараа Улсын Их Хурлын дарга Д.Амарбаясгалан Эрүүл мэндийн даатгалын Үндэсний зөвлөлийн гишүүд дотор сонирхлын зөрчилтэй этгээд бий эсэхийг судалж, холбогдох хуулийн дагуу арга хэмжээ авах, шаардлагатай бол Улсын Их Хуралд танилцуулж, шийдвэрлүүлэхийг Нийгмийн бодлогын байнгын хороонд үүрэг болгов. Эрүүл мэндийн тусламж, үйлчилгээ иргэн бүрд тэгш, хүртээмжтэй, ижил түвшний хүрдэг байх шаардлагыг Д.Амарбаясгалан дарга тодотгоод “Салбарын сайд, Эрүүл мэндийн даатгалын Үндэсний зөвлөл гишүүдийн хэлж буй асуудлуудыг анхаарч, хэлж буй саналуудыг тусгаж ажиллах шаардлагатай. Иргэдэд сонголт хийх нөхцөл бүрдүүлж, чанартай эмээр үйлчлүүлэх боломжийг бүрдүүлэх чиглэлээр шийдвэр гаргахыг Засгийн газарт үүрэг болгосон. Холбогдох тогтоолын хэрэгжилтийг Нийгмийн бодлогын байнгын хороо хянан шалгаж, Улсын Их Хуралд танилцуулах нь зүйтэй” гэв.