Улсын Их Хурал дахь Монгол Ардын Намын бүлгийн ээлжит бус хуралдаан өчигдөр болов. Монгол Улсын 2025 оны төсвийн тухай хуулийн төслийг өргөн барихаас өмнөх Сангийн яамны танилцуулга, мэдээллийг Сангийн сайд Б.Жавхлан танилцуулж, гишүүдийн асуултад хариуллаа.

МАН-ын бүлгийн гишүүд Монгол Улсын 2025 оны төсвийн тухай хуулийн төсөлд хүүхдийн мөнгө, тэтгэвэр, төрийн албан хаагчдын цалингийн нэмэгдлийг хөндөхгүйгээр алдагдалгүй төсөв өргөн барих нь зүйтэй гэж үзжээ.

Мөн УИХ дахь Ардчилсан намын бүлэг өчигдөр хуралдсан. Хуралдааны үеэр Сангийн яамнаас төсвийн танилцуулга хийжээ. Энэ талаар УИХ-ын гишүүн Ч.Лодойсамбуу “Ирэх оны төсвийг 2.4 их наяд төгрөгөөр танаад оруулж ирж байна. Тухайлбал, гадаад томилолтын зардал, яригдаад байсан соёлын арга хэмжээ, шинээр тавилга авах гэх мэт ажлын төсвийг хассан байна. Мөн 2024 оны арванхоёрдугаар сарын 2-ны байдлаар гэрээ нь хийгдээгүй ажлын хөрөнгө оруулалтын зардлыг хэмнэсэн байна” гэж мэдээлэв.

Гишүүний ярианд дурдагдсан соёлын арга хэмжээг тодруулбал Соёл, спорт, аялал жуулчлал, Залуучуудын сайд Ч.Номин 18.3 тэрбум төгрөгийг эрхийн бичиг хэлбэрээр тараах тухай юм. Тэрбээр энэ тухай “Өсвөр насныханд чиглэсэн хөгжлийн бодлого тодорхойлох хэрэгтэй гэж үзсэн. Тиймээс өсвөр насныхан хичээлээс гадуур хөгжих боломжтой хөтөлбөр, арга хэмжээ хэрэгжүүлэхээр төсөвт оруулсан” хэмээж байсан.