Сансрын технологид хайртай, Хиймэл дагуул туршиж, бүтээх хүсэлтэй оюутан, залуусын оролцдог Кансат-2024 үндэсний VII тэмцээн амжилттай зохион байгуулагдлаа. Энэ тэмцээн нь залуусын бүтээлч сэтгэлгээ, техникийн мэдлэг, практик туршлагыг хөгжүүлдгээрээ онцлогтой.

Энэ жил тус арга хэмжээг сансрын технологийг ашиглан олон суваг дамжуулах үйлчилгээ үзүүлдэг ДДэш компани уламжлал ёсоор ивээн тэтгэн оролцжээ.

Лаазанд багтах хэмжээтэй бичил хиймэл дагуул бүтээдэг Кансат тэмцээн нь дэлхийн 20 гаруй оронд зохион байгуулагддаг бөгөөд 2013 оноос эхлэн монголд зохион байгуулагдсан. Энэ жилийн VII тэмцээнд 26 багийн 130 гаруй залуус өөрсдийн бүтээсэн бичил хиймэл дагуулуудыг хөөргөж, тодорхой даалгавруудыг биелүүлэн өрсөлдлөө.

Тэмцээний үеэр оюутан, залуус Кансатад зориулж бүтэн жил бэлддэг талаараа хуваалцсан юм. Тэд мөн Монгол улсад сансар судлал, техник, технологийн чиглэлээр суралцаж буй оюутан, залууст зориулсан тэмцээн, уралдаан цөөн байдаг. Иймд Кансатыг хүсэн, хүлээн оролцдогоо хэлж байв.Тэмцээн энэ жил хүрээгээ илүү тэлж, инженер, техникийн сургуулийн оюутан, залуусаар хязгаарлагдахгүй, ерөнхий боловсролын сургуулийн ахлах ангийн сурагчид мөн оролцжээ.

Тэмцээн дараах хоёр төрөлд зохион байгуулагдаж шилдгүүдээ тодруулав.
 “КАНСАТ" төрөлд:

• I байр: HIGH TECH 2 /ШУТИС-Мэдээлэл холбооны технологийн сургууль /
• II байр: HIGH TECH 1 /ШУТИС-Мэдээлэл холбооны технологийн сургууль /
• III байр: NEW SPACE /Шинэ Монгол технологийн коллеж//
• Тусгай байр: GRAVITY FALLS /ШУТИС-Мэдээлэл холбооны технологийн сургууль /

 "БУЦАГЧ" төрөлд:

• I байр: С-137 /Монгол Улсын Их Сургууль/
• II байр: АРАВТ 2 /Батлан хамгаалахын их сургууль/
• III байр: HIGH TECH 1 /ШУТИС-Мэдээлэл холбооны технологийн сургууль /
• Тусгай байр: NEW ROBO /Шинэ Монгол технологийн коллеж/
• тус тус шалгарчээ.