“Очир Ундраа ОМЗ ББСБ” хүүхдийн баярыг тохиолдуулан Очир Ундраа Группийнхээ 1000 гаруй ажилтнуудын хүүхдүүдийн дунд “Бүтээлч Үрс” уралдааныг 9 дэх жилдээ амжилттай зохион байгууллаа. Гар зураг, эсээ бичлэг, Тик Ток гэсэн сэдэвтэйгээр зохион байгуулагдаж ирсэн “Бүтээлч үрс” уралдаан энэ жил байгаль дэлхийдээ ээлтэй байхыг нийт ажилтнууд, ирээдүй болсон хүүхэд багачуудад уриалж ахуйн хог хаягдлыг дахин ашиглаж бүтээл хийх удирдамжтайгаар “Эко Ирээдүй” сэдвийн дор болсон нь онцлог байлаа. Энэ удаагийн уралдаанд шалгарсан бүтээлд байр эзлүүлж шагнал гардуулах арга хэмжээг “Очир Ундраа ОМЗ” ББСБ-ын дэргэдэх “Очун Кидс” хүүхдийн цэцэрлэг дээр зохион байгуулж хөгжилтэй хөөрхөн алиалагч, Пороро, Бэйби Шарк нарын үзүүлбэрээр хүүхэд багачуудаа баярлуулж бэлэг барилаа.

Хүүхдүүд нэг удаагийн хуванцар бүтээгдэхүүн, зайрмагны иш, ундааны сав, шил, гялгар уутыг ашиглаж байгальдаа ээлтэй байх санааг шингээсэн мөнгөний гахай, тоглоом, байшин, макет, цэцэг, сонгодог зургийн бүтээлүүд зэргийг урлаж шагнал гардуулах арга хэмжээний үеэр бүтээлийнхээ талаар танилцуулсан юм.  

Энэ үеэр Очир Ундраа ОМЗ ББСБ-ын гүйцэтгэх захирал Г.Цогтгэрэл “Хог хаягдлаа багасгах дахин боловсруулах талаар эцэг эхчүүд хүүхдэдээ зааж сургах үүрэгтэй. Эцэг эхчүүд ч энэ үүргээ биелүүлэхийн тулд өөрсдийн мэдэхгүйг мэдэж хүүхэдтэйгээ хамтдаа сурч хөгжсөн бүтээлч уралдааныг зохион байгуулж хүүхэд багачуудаа баярлуулсандаа баяртай байна” хэмээн сэтгэгдлээ хуваалцав.
Уралдаанд шалгарсан дараах бүтээлүүдийг хүн бүрд эх дэлхийгээ хайрлах сэдлийг өгч байх үүднээс “Очир Ундраа групп”-ийн харьяа компаниудад хуваарилж Харилцагчийн Үйлчилгээний хүлээлгийн хэсэгт үзэсгэлэн болгож байршуулахаа илэрхийллээ. 

Хүүхдийн эрхийг хамгаалах өдрийг тохиолдуулан “Очир Ундраа ОМЗ ББСБ”-аас зохион байгуулсан тус уралдаан нь ажилтнууддаа болон тэдгээрийн хүүхдүүдэд хандсан бүтээлч арга хэмжээ болсноос гадна бусад аж ахуйн нэгж байгууллагуудаа уриалж буй байгаль орчин, нийгэмдээ чиглэсэн үр дүнтэй ажил болсныг онцлох нь зүйтэй. Мөн түүнчлэн өнгөрсөн онд “Очир Ундраа ОМЗ ББСБ”-ын 15 жилийн ойн хүрээнд байгууллагын дэргэдэх “Очун Кидс” цэцэрлэгийг бага болон ахлах бүлэг, сургуулийн насны хүүхдийн өдөр өнжүүлэх ангитайгаар ажилтнуудынхаа нийгмийн томоохон асуудлыг шийдвэрлэж, хүүхдийн аюулгүй орчинд өсөж торних эрхийг ханган ажиллуулж байна.

Нийгэмдээ үлгэр дуурайлалтайгаар багачууд хүүхдүүдээ баярлуулж, байгаль дэлхийгээ хайрлахыг уриалж буй “Очир Ундраа ОМЗ ББСБ”-ын нийт ажилтан тэдгээрийн хүүхдүүдэд хүүхдийн баяр, олон улсын хүүхдийн эрхийг хамгаалах өдрийн мэндийг хүргэе.