ОХУ-ын Засгийн газраас дотоодын зах зээлээ тогтворжуулах үүднээс хуучин ЗХУ-ын бүрэлдэхүүнд байсан дөрвөн орноос бусад бүх улс руу бензин, дизель түлш экспортлохыг түр хугацаагаар хориглоно гэж мэдэгдлээ. Мэдэгдэлтэй холбоотойгоор УУХҮ-ийн сайд Ж.Ганбаатар өнөөдөр мэдээлэл хийв.

Тэрбээр, Монгол улс дизель түлш болон автобензиний Засгийн газраас тогтоосон хэмжээ болох 30-аас дээш хоногийн нөөцтэй байна.

ОХУ-ын Засгийн газрын тогтоолын хүрээнд хоригт манай улс багтсан эсэх талаар ГХЯ-тай хамтран Роснефть компанитай ярилцаж байна. Эцсийн хариуг хоёр хоногт багтаан өгөх болно гэсэн юм.

Мэдээлэлтэй холбоотойгоор шатахуун импортлогчид үнэ нэмэх эрсдэлтэй бөгөөд үүнийг хэрхэн шийдвэрлэх талаар сайд Ж.Ганбаатараас тодруулахад, Үнийг нэмэгдүүлэхгүй байх зарчим баримтална.

АИ-92 автобензиний үнэ Улаанбаатар хотын хэмжээнд нэг сарын дотор нэмэгдэхгүй гэдгийг албан ёсоор хэлье. Хөдөө орон  нутагт тээвэрлэлтийн зардал нэмэгддэг. Дизель түлшний нөөц хангалттай байгаа. Хэдийгээр нөөц хангалттай байгаа ч гэсэн ачилт 7-10 хоногт саатахад Монгол Улсад асуудал үүснэ. Үүнийг би ярилцлага бүрдээ хэлж байгаа гэлээ.