Умард Солонгосын удирдагч Ким Жон Ун өөрийн өв залгамжлагчаар охин Ким Жү Эг албан ёсоор сонгосон гэж Өмнөд Солонгосын тагнуулын албанаас мэдээллээ.

Өмнө нь Ким Жү Эг залгамжлагч болгоход бэлтгэж байгаа гэх мэдээлэл байсан бол одоо албан ёсоор залгамжлагчаар нэрлэх шатанд хүрсэн гэв. 

Ким Жон Ун гэр бүл болон хүүхдүүдээ тэр бүр олны өмнө ил гаргадаггүй бөгөөд гурван хүүхэдтэй гэх мэдээлэл байдаг. 

Тэднээс одоогоор Ким Жү Э л олны өмнө ил гарсан. Албан ёсны залгамжлагч гэгдэх түүний талаарх зарим мэдээллийг хүргэж байна. 

Түүний охин Ким Жү Э одоо 13 настай гэх мэдээлэл бий бөгөөд сүүлийн үед Ким Жон Унтай хамт албан ёсны уулзалт, айлчлалуудад оролцох болсон.

Түүнийг Ким Жон Уны хоёр дахь хүүхэд гэж тодорхойлдог. Тэрбээр дээрээ нэг ахтай гэсэн мэдээллийг Өмнөд Солонгосын тагнуулын албанаас өгдөг. 

Ахынхаа өмнүүр залгамжлагчаар тодорхойлогдсон нь олон улсын анхаарлыг татаж байна. 
Ким Жү Эгийн талаарх мэдээлэл 2022 оныг хүртэл маш хомс байв. Тэрбээр 2022 оны арваннэгдүгээр сард анх удаа төрийн телевизээр гарсан юм. 

Тухайн үед тэрбээр Ким Жон Унтай хамт тив алгасах баллистик пуужингийн туршилтыг шалгаж байсан. 

Үүнээс хойш Ким Жү Э албан ёсны болон томоохон арга хэмжээнүүдэд Ким Жон Унтай хамт оролцож эхэлсэн бөгөөд 2025 оны есдүгээр сард анх удаа гаднын айлчлалд оролцсон юм. Тэр нь Бээжинд болсон цэргийн парад байв.

Ким Жү Э морь унах, цанаар гулгах, сэлэх дуртай бөгөөд Пьёнянд гэрээрээ хичээл заалгадаг аж. 

Түүний насны охидыг урт үстэй байхыг хориглодог ч Ким Жү Э урт үстэй ба улсад нь олдоход хэцүү байдаг үнэтэй брэндийн хувцас өмссөн нь харагддаг. 

Анх олон нийтэд цацагдсан зургуудад Ким Жү Э аавыгаа дагалдаж, хойноос нь явж байгаа харагддаг байсан бол сүүлийн үед түүнтэй зэрэгцэн алхах болсон аж. 

Эх сурвалж: ВВС