Өнгөрсөн долоо хоногт болсон “Air India” компанийн онгоцны ослоос амьд гарсан цорын ганц хүн болох Их Британийн иргэн Вишвашкумар Рамеш тухайн онгоцны ослоор өөд болсон ахынхаа оршуулах ёслолд оролцжээ.

Энэтхэгийн баруун хэсэгт болсон уг ёслолд тэрбээр авсыг нь өргөж яван, чандарлах газарт хүргэсэн байна. Энэ үеэр нүүрэндээ шархтай, боолттой Рамеш гашуудан уйлж байв. Тэрбээр ослоос хойш таван өдрийг эмнэлэгт эмчлүүлж өнгөрүүлсэн юм.

Лондон чиглэлд “Боинг 787-8 Dreamliner” онгоц өнгөрсөн пүрэв гарагт Энэтхэгийн Ахмедабад хотоос хөөрснөөс хэдхэн хормын дараа осолдсон бөгөөд 270 гаруй хүн амь үрэгдсэний нэг нь түүний ах Ажай байжээ.

Рамешийн ээж мөн оршуулгын ёслолд оролцжээ. Хэдий энэхүү өдөр гадаа бороотой байсан ч оршуулгын ёслолд оролцохоор хүмүүс олноор ирсэн байна.

Азтай Рамеш хэрхэн амьд үлдсэнийг хэн ч одоогоор нарийн тодорхой мэдэхгүй байгаа юм. Гэхдээ ослын газарт анхны тусламж үзүүлсэн нэг хүн BBC-д ярилцлага өгөхдөө Рамеш дүрэлзэж буй онгоц руу буцаж орж, ахыгаа хайхыг оролдож байсан гэж ярьжээ.

Энэ долоо хоногт цацагдсан нэгэн бичлэгт түргэн тусламжийн жолооч Рамешийг гал, утааны дундаас аюулгүй газар руу хөтөлж яваа нь бичигджээ. 40 настай Вишвашкумар Рамеш онгоцны 11А суудалд сууж явсан бөгөөд ах нь түүнээс хэдхэн суудлын цаана сууж байжээ.

Харин Ерөнхий сайд Нарендра Моди өнгөрсөн долоо хоногт түүнтэй биечлэн уулзсан юм.

Эх сурвалж: BBC