Сүхбаатарын талбайд “Огцрох амархан” жагсаал үргэлжилж байна. Жагсаалын зорилго нь Ерөнхий сайд Л.Оюун-Эрдэнийг орлогоо нотлох, нотолж чадахгүй бол огцрохыг шаардаж буй юм.

УИХ-ын гишүүн Ж.Баярмаа “Залуучууд үг, үзэл бодлоо илэрхийлэн тайвнаар жагсан, цуглаж буйг ардчиллын дархлаа гэж бодож байна. Энэ дархлаа илүү хүчтэй байгаасай гэж үзэж, өнөөдөр дэмжихээр ирлээ.

Одоогоос 7 жилийн өмнө өнөөгийн Ерөнхий сайд энд чухамхүү төрийг хямралаас гаргана, ард түмнээ ядуурлаас салгана гэж амлаад эрх мэдэлд хүрсэн. Эрх мэдлээ зургаа дахь жилдээ эдэлж байгаа. Гэвч амласан, ярьсан зүйлс нь өнөөдөр биеллээ олоогүй байна. Ард түмэн өнөөдөр барааны үнийн өсөлтөд нэрвэгдэж байгаа. Ажил олдохгүй, ажил хийсэн ч хамаг нь татварт явчхаж байна. Тайван, амгалан, аятай, тухтай амьдрах нөхцөл ерөөсөө нэмэгдээгүй. Тэгэхээр нэг гараар татвар төлөгчийн мөнгийг цуглуулаад, нөгөө гараараа тэдэнд зарцуулах ёстой байтал гарын салаагаараа, үр дүнгүйгээр урсгаж байгааг төсөв хэлэлцэхээс эхлээд л би шүүмжилж ирсэн.

Ерөнхий сайд 7 жилийн өмнө энэ талбай дээр Япон, Солонгос зэрэг улсын Ерөнхий сайд нар жижиг алдаа гаргаад огцордог гэж хэлж байсан. Ам алдвал барьж болдоггүй. Одоо өөрөө үүсээд буй нөхцөл байдлыг, үйл явцыг юу гэж дүгнэж байгаа нь сонин байна.

Хүүтэй нь холбоотой асуудал бий. Хүнийг шууд гүтгэмээргүй байна. Шалгах нь зайлшгүй. Хуульдаа өндөр, дээд албан тушаалтны орлого шударга байх ёстой, үүнийг шалгах ёстой гэж заасан байгаа. Тэр залуу өөрөө бизнес хийгээд мөнгө олж болно шүү дээ. Элон Макс, Марк Цукерберг шиг агуу байхыг үгүйсгэхгүй. Үнэхээр тийм бол бусад залуустаа зааж өгөөсэй” гэв.