Тэрбумтан Илон Маск болон АНУ-ын ерөнхийлөгч Дональд Трамп нарын маргаан ширүүсч, олон нийтийн өмнө бие биенээ хурцаар шүүмжилж эхэлсэн.

Тэгвэл Илон Маскийн тухай бодох ч үгүй байгаа, ойрын хугацаанд ярихыг ч хүсэхгүй байгаа гэсэн Трамп Тесла-гаас худалдан авсан Model S загварын автомашинаа зарах эсвэл бүр хэн нэгэнд хандивлаж магадгүй байгааг Цагаан ордны эх сурвалж мэдээлжээ.

Трамп, Маск нарын зөрчилдөөний дараа Тесла компанийн хувьцаа огцом унасан нь томоохон алдагдал болсон юм. 

Тэдний маргаан Трампын санаачилсан татварыг бууруулж зардлыг нэмэгдүүлэх хуулийн төслийг Илон Маск шүүмжилснээр эхэлсэн.

Үүний хариуд Трамп цаашид Илон Масктай сайн харилцаатай байх эсэхээ мэдэхгүй байна хэмээж, төсөв хэмнэх хамгийн амархан арга нь Илон Маскийн компаниудтай хийсэн Засгийн газрын гэрээг цуцлах гэсэн юм. 

Бие биедээ хаяглаж, хатуухан үгс хэлсэн нь цаашлаад сонгуулийн үр дүнтэй хүртэл холбогдож эхлэв. Тухайлбал Илон Маск "Би байгаагүй бол Трамп сонгуульд ялахгүй байсан" хэмээн бичсэн. 

Энэ оны гуравдугаар сард Трамп Тесла-гийн автомашин худалдан авсан бөгөөд “Тесла” компанийн үйл ажиллагааг эсэргүүцэж байгааг "дотоодын терроризм"-д тооцохоо ч мэдэгдэж байв.

Тухайн үед “Tesla Takedown” нэртэй хөдөлгөөн өрнөж байсан ба Трамп Маскийг дэмжиж 80 мянган ам.доллароос эхэлдэг автомашин худалдан авсан. Энэ нь тэднийг ямар дотно харилцаатай байсныг илтгэнэ.

Илон Маск "Ерөнхийлөгч Трамп болон түүний засаг захиргааны гайхалтай бодлогын үр дүнд "Тесла" ирэх хоёр жилийн хугацаанд автомашины үйлдвэрлэлээ хоёр дахин нэмнэ" гэж байв.

Эх сурвалж: CNN