Засгийн газрын гишүүн, Сангийн сайд Б.Жавхлан өнөөдрийн Засгийн газрын ээлжит хуралдаанаас гарсан эдийн засгийн зарим шийдвэрийг танилцууллаа. 

Mонгол улсын валютын нөөц 5 тэрбум 246 сая ам.долларт хүрлээ

Тэрбээр "Өнгөрсөн 7 хоногт гол түүхий эдийн экспорт нэмэгдсэн. Он гарснаас хойш 278 сая долларт хүрсэн нь энэ оны хувьд өндөр дүн, өнгөрсөн 7 хоногоос 40 гаруй сая ам.доллароор илүү байна.

Нарийн сухайтын бүлэг ордоос буюу хувийн уурхайгаас хийгдсэн экспорт нөлөөлж байна. Ийнхүү бараг 2 сая тонн нүүрс арилжаалсан. Энэ нь мөнгөн дүнгээр 40 гаруй сая ам.доллар гэсэн үг ба валютын нөөц нэмэгдэхэд нөлөөлсөн. Он гарснаас хойш Mонгол улсын валютын нөөц 5 тэрбум 246 сая ам.долларт хүрлээ. 

Нэгдүгээрт Гашуунсухайт, Шивээхүрэн, Ханги, Булган, Бичигт боомтуудад валютын нөөцөд эерэг үр дүн үзүүлэх, яаралтай гарах шаардлагатай экспортуудыг зөв эрэмбэлж хийх чиглэл өглөө. 

Өрсөлдөх чадварыг нэмэгдүүлэх, өртгийг бууруулах арга хэмжээ авахаар экспортын бүтээгдэхүүнийг ачуулах, төмөр зам гартал үүсэж буй өртгийг бодитоор бууруулахыг нүүрсний болон тээврийн компаниудад чиглэл өглөө" гэсэн юм.  

Евразийн эдийн засгийн холбоо (ЕАЭЗ)-ны гишүүн орнууд болон Монгол Улс чөлөөт худалдааны түр хэлэлцээр байгуулахтай холбоотойгоор сэтгүүлч асуулт асуув.

Тэрбээр "Евразийн хэлэлцээрийн хувьд оросууд биш бид өөрсдөө сүүлийн 20 жилд шамдуулсан ч яг гарын үсэг зурах болсон чинь бид хойшоо суугаад байгаа юм. Гадаад худалдаа бол хоёр урсгал буюу экспорт болон импорт. 20 жилийн өмнө бидний эхлүүлсэн зорилго бол малчдын хотонд үнэгүйдээд байгаа арьс шир, ноосыг экспортод үнэ хүргэж гаргая гэж байсан. Харин сүүлийн жилүүдэд хүнсний хувьсгал, цагаан алт үндэсний хувьсгалын үр дүнд бид дотооддоо үйлдвэртэй болсон ч харилцан адилгүй байна. Гэхдээ бид дотоодын нөөцийн 50 хувийг хангах хэмжээний ногоо тарьж, дотоодын хэрэгцээг хангах өндөгний нийлүүлэлттэй болсон.

Харин нөгөө том зорилго болох ХАА-ын гаралтай түүхий эдээ гаргахын тулд том экспорт буюу Евразийн хэлэлцээрийн дагуу үүнээс ухарч болохгүй байгаа юм. Бид бүтээгдэхүүн нэг бүрээрээ зөвшилцсөн, одоо зөвшөөрч байгаа дээр нь хийе гэдэг л санаа. Барууны тэр дундаа Трампын тарифын шийдвэр гадаад худалдаанд маш тодорхойгүй нөлөөлж байгаа энэ үед хэлэлцээрийг хийе, экспортоо түлхүү хийж болох бол тэр биз, болбол цааш нь үргэлжлүүлээд явъя гэдэг зарчим дээр ЗГ нэгэнт шийдвэрээ гаргасан" гэв.