Ерөнхий сайд Г.Занданшатар нийслэлийн болон 21 аймгийн засаг дарга, ИТХ-ын дарга нар нарыг Төрийн ордонд хүлээн авч уулзаж байна. Уулзалтыг нээж Ерөнхий сайд үг хэлсний дараа аймаг, нийслэлийн Засаг дарга нар санал, хүсэлтээ илэрхийллээ.

Өвөрхангай аймгийн Засаг дарга О.Пүрэвдорж “Манай аймгийн хувьд оны эцсийн байдлаар 2 сая гаруй малыг эдийн засгийн эргэлтэд оруулсан. Нэхий, арьс шир үнэгүй байна. Үүнийг яаж үнэтэй болгох вэ?.

Улсын төсвөөс хэрэгжиж байгаа төсөл, арга хэмжээг Төрийн худалдан авах ажиллагаагаар зарлаж байна. Манай аймагт өнгөрсөн жил төрийн албан хаагчийг орон сууцжуулах хүрээнд 5 суманд тендер зарласан. Үнэхээр шаардлага хангахгүй аж ахуй нэгж орж ирж байна. Энэ мэт жижиг ажлын эрхийг орон нутагт шилжүүлээд өгчхөж болохгүй юу. Тэнд амьдарч байгаа хүмүүс цалинтай, орлоготой болгох юм. Орон нутгаа дэмжээч гэдэг санал хэлмээр байна.

Төв аймгийн Засаг дарга Л.Төмөрчөдөр “Тендер сонгон шалгаруулалттай холбоотой асуудлыг хэлье гэж бодож байна. Орон нутагт ЖДҮ эрхлэгчдийг дэмжиж чадахгүй байгаа. Хүнсий жижиг үйлдвэр, цэхүүд орон нутагт бий. Сургууль, цэцэрлэгүүдэд дэлгүүрүүд бараа, бүтээгдэхүүн нийлүүлж байгаа. Энэ эрхийг нь сургуулийн захирал, сум орон нутгийн удирдлагад нь олгох зохицуулалт хийж өгөөч. Талх бариад, сүү сүүн бүтээгдэхүүн боловсруулаад байдаг. Гэтэл үүнийг орон нутагтаа нийлүүлж чадахгүй байна. Тиймээс стандартыг нь тавьж өгөөд олон шалгуургүйгээр нийлүүлэх боломжийг хуулиар гаргаж өгөөч гэдэг санал байна.

Орхон аймгийн Засаг дарга Б.Зоригтбаяр “Орон нутаг руу чиглэсэн хөрөнгө оруулалтад онцгой анхаарах хэрэгтэй байна. Манай аймагт улсын төсвийн хөрөнгөөр 11 жил барьж байгаа найман барилга бий. Аж ахуйн нэгжүүд нь хариуцлагагүй ханддаг. Ийм компаниудыг хар жагсаалтад оруулах талаас нь анхаарч ажиллаач гэдэг санал байна.  Мөн манай нийгмийн даатгалын хэлтсийн дарга үүрэг гүйцэтгэгчээр жил боллоо. Хуулийн хугацаанд нь сонгон шалгаруулалтыг явуулж албажуулж өгөөч гэж хүсэж байна.