Олон улсын эрүүгийн цагдаагийн байгууллага Интерполын хууль бус эм эмнэлгийн хэрэгсэл олон нийтийн эрүүл мэндийн эсрэг гэмт хэрэгтэй тэмцэх газраас ирүүлсэн сэрэмжлүүлэг мэдээллийг хүргэж байна. 

Энэтхэг улсад ханиадны сироп хэрэглэсэн хүүхдүүд нас барж, гурван төрлийн сироп хэлбэрийн эмийг аюултай хэмээн сэрэмжлүүлээд байна.

Сүүлийн нэг сарын хугацаанд Энэтхэг улсын Матхия Прадиш мужийн Чкиндвара дүүрэгт "колдриф" нэртэй ханиадны сироп хэрэглэсэн 22 хүүхэд бөөрний дутагдлаар нас баржээ. Тус хэргийг мөрдөн шалгах явцад "колдриф" хэмээх сиропод диэтилийн гликол хэмээх хорт бодис агуулагдаж байсан нь тогтоогджээ. Энэ нь бөөрний ажиллагааг доголдуулж улмаар үхэлд хүргэдэг бодис аж.

Тус улсын эмийн хяналтын байгууллагаас "COLDRIF", "RespiFresh-TR" болон "Relife" гэсэн хуурамч гурван төрлийн ханиадны сиропыг хэрэглэхэд аюултай хортой хэмээн албан ёсоор зарлаж хэрэглэхгүй байхыг анхааруулсан байна.

Төрийн тусгай алба хаагчдын нэгдсэн эмнэлгийн клиникийн эм судлаач Ц.Мишээл, "Улирлын томуу, томуу төст өвчний дэгдэлт эхэлж байгаа энэ үед бага насны хүүхдэд ханиадны сироп өгөх гэж байвал анхаарах гол зүйлс бол,

Нэгдүгээрт, шошгонд заасан найрлагыг сайтар шалгах. Туслах бодисуудад диэтилийн гликол, пропилен гликол, сорбитол, глицерин зэрэг эмэнд зөвшөөрөгдөхгүй, хортой бодисууд орсон эсэхийг нягтал. 

Хоёрдугаарт, хувь хүний гараас гарах буюу танихгүй эх сурвалжаас, цахим орчноор дамжуулан эм авахыг аль болох зайлсхий. Ийм замаар авсан эмийн үйлдвэрлэлийн эх үүсвэр, үйлдвэрлэлийн шаардлага мөрдөгдсөн эсэх нь тодорхой бус тул эрсдэл өндөр.

Хортой бодис агуулсан сироп богино хугацаанд бөөрний ноцтой дутагдалд хүргэж, урт хугацаанд бага тунгаар хэрэглэсэн ч бөөрний архаг дутагдал, хараа муудах, мэдрэлийн болон булчингийн гэмтэл, сэтгэл зүйн өөрчлөлт зэрэг хүндрэл үүсгэх эрсдэлтэй. Тиймээс хүүхдийн эмийг заавал тусгай зөвшөөрөлтэй байгууллагаас, эмчийн заавраар авж хэрэглээрэй" гэв.

Эх сурвалж: ЦЕГ