Замын хөдөлгөөн удирдлагын газраас тээврийн хэрэгслийг зөөж шилжүүлэх, түр саатуулах асуудлаар өнөөдөр мэдээлэл өглөө.

Энэ талаар ЗХУТ-ийн Авто зогсоолын удирдлага, хяналтын хэлтсийн дарга С.Бямбасүрэн тайлбар өгөв. Тэрбээр "Ачигч автомашины жолооч хутга гарган танхайрсан бичлэг цахим сүлжээнд өчигдөр тарсан. Гэрээ байгуулж ажилладгийн хувьд буруутай үйл ажиллагаа гаргасан ажилтан болон харьяа компанийн өмнөөс иргэдийг бухимдуулсан явдалд уучлалт гуйж байна. Тус ёс зүйн алдаатай үйлдэл БГД-ийн "Ачлал" их дэлгүүрийн зүүн талд болсон бөгөөд тухайн автомашин ачилтын "Баян Хаяабасу" компанийн үйл ажиллагааг зогсоосон. Уг асуудлаар БГД-ийн цагдаагийн хэлтэс зөрчлийн хэрэг нээн шалгаж байна.

Эрх бүхий байгууллагын шалгалтын шийдвэр гарсны дараа, дараагийн арга хэмжээг авч ажиллана. Мөн нийт гэрээт компаниуддаа заавал мөрдөх хуулийн хэрэгжилтийг хангаж, ёс зүйтэй ажиллахыг анхааруулж байна. Эдгээр дүрэм, журмыг зөрчвөл гэрээ цуцлах хүртэл арга хэмжээ авахыг мэдэгдье.

Автомашин түр саатуулах байр нь хоёр мянган метр квадрат талбайгаас дээш хэмжээтэй байх ёстой.

Манай байгууллага өнгөрсөн онд зөрчил гаргасан автомашиныг зөөн шилжүүлэх үйл ажиллагааг, гэрээ хийх эрхийг шилжүүлж авсан. Тус эрхийн хүрээнд энэ оны гуравдугаар сарын 24-ний өдөр нийслэлийн зургаан дүүрэг, 15 ААН-тэй гэрээ байгуулж, хэрэгжилтийг хянан ажиллаж байна.

Ажил хүлээж авснаас өнөөдрийн байдлаар 120 иргэнээс автомашин ачилттай холбоотой гомдол ирсэн. Эдгээр гомдлыг цаг хугацаанд нь хариу өгч бүрэн шийдвэрлэсэн. Өмнөх оны мөн үеэс өргөдөл, гомдлын тоо буурсан. Манай байгууллага гэрээт компаниуддаа ёс зүйн өндөр шаардлага тавьж байгаа" гэв.

Гэрээ байгуулахад ААН-үүд дараах шаардлагыг хангасан байна.

• Улсын бүртгэлийн гэрчилгээ
• Онцгой байдлын ерөнхий газрын Галын улсын байцаагчийн дүгнэлт
• Байгууллагын хариуцлагын даатгалын гэрээ
• Жолоочийн хариуцлагын албан журмын даатгалын гэрээ
• Харуул, хамгаалалт үзүүлэх гэрээ
• Байгууллагын ажилтан, техникч, албан хаагчдын хөдөлмөрийн гэрээ
• Ангиллын мэргэжлийн жолоочийн үнэмлэх
• Техникийн ажилтан ёс зүйн сургалтад суусан байх ёстой
• Тухайн түр саатуулах байр нь хоёр мянган метр квадрат талбайгаас дээш хэмжээтэй байх ёстой
• Газрын гэрчилгээ болон өмчлөлийн гэрчилгээ
• Түрээсийн гэрээ

Харин тээврийн хэрэгслийг зөөн шилжүүлэхийн тухайд замын хөдөлгөөнд зөрчил гаргасан нь үнэн болохыг Тээврийн цагдаагийн албан хаагч баталж, зөвшөөрөл олгодог аж.