Хөдөлмөрийн хөлсний доод хэмжээг ₮792 мянга болгохоор шийдвэрлэснийг өчигдөр мэдээлсэн.

Тэгвэл яагаад, яаж хөдөлмөрийн хөлсний доод хэмжээг өөрчилж, ямар зарчмаар тогтоодгийг сийрүүлье. Ижил нэрт хуульд хөдөлмөрийн хөлсний доод хэмжээг хоёр жилд нэг удаа шинэчлэн тогтоож болно гэжээ.

Ингэхдээ Хүн амын амьжиргааны доод түвшинг тодорхойлох тухай хуулийн 5.1-д заасны дагуу тогтоосон түвшингээс багагүй байна. Өөрөөр хэлбэл Хүн амын амьжиргааны доод түвшинг, хэрэглээний доод хэмжээг үндэслэн Үндэсний статистикийн газар тодорхойлох юм. Тэгвэл Хүн амын амьжиргааны доод түвшингийн хэмжээг жилд 1-ээс доошгүй удаа шинэчлэн тодорхойлдог байна.

Мөн дараах хүчин зүйлийг харгалзан хөдөлмөрийн хөлсний доод хэмжээг тогтооно,

• Хүн амын амьжиргааны доод түвшний өөрчлөлт
• Хөдөлмөрийн бүтээмж, дундаж цалингийн зохистой харьцаа;
• Нийгмийн даатгалын сангаас олгох бүрэн тэтгэврийн доод хэмжээ;
• Эдийн засгийн өсөлт, хөдөлмөр эрхлэлтийн түвшин.
• Инфляцын түвшин

Түүнчлэн Хөдөлмөрийн хөлсний доод хэмжээг Засгийн газар, ажил олгогчийн болон ажилтны эрх, хууль ёсны ашиг сонирхлыг төлөөлөн хамгаалах улсын хэмжээний байгууллагын төлөөлөл бүхий Хөдөлмөр, нийгмийн зөвшлийн гурван талт Үндэсний хороо тогтооно гэж хуульчилжээ.

• Гэр бүл, хөдөлмөр, нийгмийн хамгааллын яам,
• Монголын Үйлдвэрчний Эвлэлийн холбоо,
• Монголын Ажил олгогч, эздийн холбоодын хамтарсан Хөдөлмөр, нийгмийн түншлэлийн үндэсний хорооны хурал болсноор ₮792 мянга болгохоор шийдвэрлэжээ.

Тэднээс уг шийдвэрийг хэрхэн боловсруулж, гаргасныг Гэр бүл, хөдөлмөр, нийгмийн хамгааллын яамнаас тодруулахад, “Дараа долоо хоногийн даваа гарагт буюу ирэх сарын 14-нд нийтэд мэдээлнэ” гэв.