166 сая жилийн өмнөх Юрийн галавын үед хамаарах бараг 200 ширхэг үлэг гүрвэлийн мөрийг Английн Оксфордширтоос илрүүлжээ.

2023 онд карьерийн ажилтан Гари Жонсон шохойн чулуу олборлож байх үед газарт хачирхалтай овон товон байгааг анзаарч, улмаар энэ гайхамшигт олдворыг анх илрүүлсэн байна. Эрдэмтэд үүнийг "Үлэг гүрвэлийн хурдны зам" хэмээн нэрлэсэн нь эдгээр эртний амьтдын ул мөр маш өргөн тархсан байсантай холбоотой юм.

Дэлхийн бусад хэсгээс Юрийн галавын үеийн ул мөр олдсон тохиолдол бий ч, Оксфордширт илэрсэн уг талбай нь Их Британийн хамгийн томд тооцогдож байна.

2023 оны 6 дугаар сард Бирмингемийн болон Оксфордын их сургуулийн 100 орчим сайн дурын ажилтан хамтран долоо хоногийн турш эдгээр мөрийг малтаж, нарийвчлан бүртгэжээ. Энэ нь 1824 онд Оксфордширт анх удаа тайлбарлагдсан Megalosaurus үлэг гүрвэлийн 200 жилийн ойтой давхцаж байгаа нь онцгой ач холбогдолтой юм.

Шинжлэх ухааны ач холбогдол

Малталтын явцад таван урт ул мөр бүхий замыг илрүүлсэн бөгөөд хамгийн урт нь 150 метр хүрчээ. Эдгээр замуудын дөрөв нь урт хүзүүтэй, дөрвөн хөлтэй, өвсөн тэжээлт үлэг гүрвэлүүд, тухайлбал Cetiosaurus төрөл зүйлд хамаарах мөр байсан аж. Тэдний мөр хамгийн томдоо 90 см хүрч байв. Гурав дахь зам нь махан идэшт, гурван хуруутай, Megalosaurus үлэг гүрвэлийнх бөгөөд мөр нь 65 см урттай байжээ.

Технологийн дэвшлийн ачаар эрдэмтэд эдгээр ул мөрийг ашиглан үлэг гүрвэлийн хөдөлгөөн, хооллох дадал, нийгмийн зохион байгуулалттай холбоотой шинэ мэдээлэл олж авах боломжтой болох юм.

Эх сурвалж: CNN