Эмч нар цалингаа 3.5 сая төгрөгт хүргэхийг УИХ, Засгийн газар, Эрүүл мэндийн сайдаас шаардан аравдугаар сарын 9-нөөс хойш жагсаал, цуглаан зохион байгуулж байна. Гэвч авч хэлэлцэхгүй, тодорхой арга хэмжээ авахгүй байгаа тул ажил хаялт зарлахаар бэлтгэж эхэлснээ Монголын эрүүл мэндийн ажилтны үйлдвэрчний эвлэлээс танилцууллаа.

Эмч нарын төлөөлөл “Үндсэн цалинг 3.5 сая төгрөгт хүргэ гэхэд 15 хувиар нэмнэ гэсэн, энэ бол 200,000 төгрөг. Цалингаа 200,000 төгрөгөөр нэмүүлэх гэж бид энд жагсаагүй. 

Цалингаас гадна гүйцэтгэлийн санхүүжилтийн асуудал бий. Эмнэлэгт хэвтэн эмчлүүлж байгаа хүмүүсээс эм, тариагаа худалдаад аваад ир, манайд байхгүй” гэх байдлаар хүнд нөхцөлд ажиллаж байна. Ирэх жилийн эрүүл мэндийн даатгалын санхүүжилтийг бууруулжээ. Улсын төсөвт 3 их наядыг оруулж ирсэн ч, одоо хэлэлцэж байгаа нь 2.2 их наяд байна. Ийм буурсан төсвөөр эрүүл мэндийн салбар үйл ажиллагаа явуулна гэвэл үүнээс үүдэн маш олон асуудал тулгарна.

Жишээ нь, хөдөлмөрийн нөхцөлийн асуудал чухал байна. Халдвартай, хортой нөхцөлд маш олон эмч ажиллаж байгаа. Тэр хүмүүс эмнэлгийн иж бүрэн нормын хувцас өмсөх ёстой байтал тийм биш. Сүүлийн таван жил энэ иж бүрэн хувцсыг аваагүй эмнэлэг олон байна. Өмд, цамц л өгөөд байдаг, гэтэл гутал буюу углаашийг эмч өөрөө цалингаараа авдаг. Эмч нарт өдрийн цайгаа уух хоолны өрөө алга. 

Эмч нар маш их ачаалалтай ажилладаг, гэтэл цалин багатай. Маш их зээлтэй, цалингийн, ипотекийн, 2-3 апликейшны зээлтэй байна.