Хонин цагаан үүл нь ээ хө
Хувирч сэрээд нүүлээ дээ хө нүлээ дээ
Хонгор жаалхан чамтайгаа би ай хө
Ханилахын заяа ч дутлаа даа хө
Хонгор жаалхан чамтайгаа би ай хө
Ханилахын заяа ч дутлаа даа хө

Дуу хөгжимд дуртай хэсэг залуус 80, 90-ээд оны цаг үед хамтдаа "аяллаа". Хувцаслалтын код, мөн л 80, 90-ээд оных гэж зааж өгсөн тул уг үдэшлэгийн хаалгаар оруут, цаг хугацааны машинд суугаад өнгөрсөн үед орсон мэт санагдана. Үүдэн хэсэгт улаан халуун сав,  приставк, пянз тоглуулагч, буйдан, түшлэгтэй модон сандалтай буланд цаг хугацаагаар аялагчид хэсэг саатан патиараа татуулна. Хуучны эвхдэг босоо тольд тусах дүрс бүр тэдний залуу насны, магадгүй ээж аавынх нь залуу үеийн гялбааг дахин амилуулж, гэрэл зургийн хальсанд дурсамж болон үлдэж байлаа. Ээжийнхээ хөх дээл, аавынхаа хуучин цагийг зүүсэн залуустай ч энд таарав. 

Тэгвэл тэднийг энд үдэшлэгийн уур амьсгалаас гадна, дуу хуур нэгтгэж байлаа. ХОНИН ЦАГААН ҮҮЛ - ДУУ БҮЖГИЙН ҮДЭШЛЭГ VOL.07 энэ удаад долоо дахь жилдээ зохион байгуулагдаж байна. Уг үдэшлэгийг Lemon Plus, Sonsy, Baga toirog Channel хамтран зохион байгуулж, хүрэлцэн ирсэн зочид нэгэн үдшийг өнгөрсөнд үдлээ. 

Үдэшлэг  The Pips хамтлагаар эхлэв, мөн дуучин С.Оргил /Болор хамтлаг/, дуучин Б.Сарантуяа, дуучин Т.Солонго,  DJ Roxy нар үзэгч, сонсогчдын сонорт хуучны аялгуут дуунуудыг хүргэлээ. 

"80, 90-ЭЭД ОНЫ УУР АМЬСГАЛ, ДУУНУУДЫГ ОДОО ҮЕИЙН ЗАЛУУСТ ТҮГЭЭХ НЬ БИДНИЙ ЗОРИЛГО"

Baga toirog Channel-ийн продюсер Ц.Тэгшбаяр:
- Lemon Plus-ийн жил бүр зохион байгуулдаг Хонин цагааг үүл дуу бүжгийн долоо дахь удаагийн үдэшлэгийг хамтран зохион байгуулах санал ирэхэд, бид дуртайяа хүлээн авсан. Мэдээж үдэшлэгийн зорилго нь 80, 90-ээд оны уур амьсгал, дуунуудыг одоо үеийн залууст түгээх юм. Энэ удаагийн эвентийн ивээн тэтгэгчээр Sonsy платформ бую аппликэйшн ажиллаж байна. Монголд хөгжмийн салбарыг ивээн тэтгэдэг байгууллага маш цөөн байдаг. Мөн монгол дуу сонсдог хөгжмийн платформ ч цөөн. Шинээр Sonsy аппликэйшн гарсанд бид маш баяртай байгаа.

"Монгол контент" ХХК-ийн Маркетинг, Борлуулалтын хэлтсийн менежер Ё.Тэлмэн:
-Мэндлээд удаагүй байгаа Sonsy платформын талаар мэдээлэл өгнө үү?
- sonsy хөгжмийн стрийминг үйлчилгээ нь хэд хэдэн онцлох зүйлтэй. Юуны түрүүнд бид дэлхийн хөгжмийн болон медиа технологийн тэргүүлэх платформ Tuned Global-тай хамтран, тэдний White-Label стрийминг аппликэйшний загвараар бүтээсэн. Энэ нь дата болон хиймэл оюун ухаанд тулгуурласан хамгийн сүүлийн үеийн, дэвшилтэт үйлчилгээ гэсэн үг. Аппликэйшн маань ч оффлайн сонсох, плэйлист үүсгэж хуваалцах гэх мэт олон сонирхолтой функцүүдтэй.  

-Хонин цагаан үүл эвенттэй хэрхэн хамтран ажиллаж байна вэ?
- Манай аппликэйшн бүх цаг үеийн монгол хөгжмийг нэг дор цуглуулсан ертөнц болохыг зорьж, бүрэлдүүлж яваа. Тиймдээ ч фэнүүдтэйгээ удаан хугацаанд уулзаагүй  уран бүтээлчид, тэдний ховор нандин дуу хөгжмийг сонсогчдод ойртуулах нь бидний ажлын салшгүй нэг хэсэг. "Хонин цагаан үүл" эвэнтийн энэ концепт нь бидэнтэй нийцсэн. Ташрамд гоё үйл ажиллагаа зохион байгуулсан Baga toirog channel, Lemon plus media-даа талархал илэрхийлье.

- Sonsy нь Монголын хөгжлийн салбарт нэгэн шинэ өнгө төрхийг нэмсэн гэж бодож байна. Та бүхний цаашдын зорилго, сонсогчдод санал болгох шинэлэг зүйл юу байх вэ?
-Бид хуучны ховор нандин дуу хөгжмөөс эхлээд орчин үеийн хит бүхий л монгол хөгжмийг сонсогчдодоо хэрэглэхэд хамгийн хялбар байдлаар, өндөр чанартайгаар хүргэнэ. Мөн цаашлаад аудио ном, подкаст, гадаад дуу оруулахаар төлөвлөж байгаа. Мэдээж уран бүтээлчдээ дэмжиж, хөгжмийн салбартаа хувь нэмэр оруулахыг үргэлж зорьж явна.

"OLD BUT GOLD"

С.Мөнхсолонго: Бид хоёр ер нь ижил зүйл сонирхдог. Анх танилцахдаа ч хуучны дууны талаар ярилцаж, нэг дуунд дуртай болохоор мэдэлцээд, тэрнээс хойш ер нь нөхөрлөж байна. Бид хоёр хуучны гэх зүйлсэд дуртай. Бид хоёр 96, 97 онд төрсөн учраас хамгийн эртнийх гэвэл 5,6 настай үеийн дурсамжууд л байдаг. /инээв/ Хэдий бидэнд 80, 90-ээд оны дурсамж байхгүй ч ээж аавын минь сонсдог байсан дуу, эдэлж хэрэглэж байсан зүйлс илүү үнэ цэнтэй, сонирхлыг минь татдаг. 

А.Сайхантунгалаг: Би багаасаа л хуучны эд зүйлд татагддаг байсан. Тиймээс хуучны дуунууд дуулагдах энэхүү үдэшлэгийг зорин ирсэн. Яг л дотоод сүнс минь сэрэх шиг болж байна. Бид хоёрын уриа "Old but Gold" юм. 

- Та хоёр эртний, хуучны ямар нэгэн эд зүйл хэрэглэдэг үү?
А.Сайхантунгалаг: Би пянз цуглуулдаг. Хуучны пянзнууд бий. 
С.Мөнхсолонго: Өнөөдөр миний өмсөөд ирсэн дээл бол ээжийнх юм. Ээж минь 1987 онд буюу 15, 16 настай байхдаа өмсдөг байсан гэсэн. Энэ хээг нь гараараа оёсон, даавуу нь одоо хаана ч байхгүй эртний материал. Надад жаахан жадайгаад багадсан байж магадгүй ч яах аргагүй энэ үдэшлэгт өмсөх хувцас минь байлаа. 

Хуучны дуунуудаас хэний дуунд дуртай вэ?
С.Мөнхсолонго: Дуучин Минжинсор гоё шдээ. 
А.Сайхантунгалаг: Би "Хаш", "Хонх", "Инээмсэглэл" хамтлагийн дуунуудад дуртай. Ер нь караокед орохоороо хуучны дуунууд л дуулдаг даа. Бидний аав ээжүүд нэг үеийнхэн, сонсдог дуу нь бас адилхан. Анх "Феличита" дууг дуулсан чинь "Хүүе ээ, чи энэ дууг мэддэг юм уу. Манай үеийнхэн бараг мэддэггүй шүү дээ" хэмээн гайхаж, тэр талаарх ярианаас л бидний нөхөрлөл эхэлсэн дээ.