Австралид анх удаа дотооддоо үйлдвэрлэсэн пуужингаа хөөргөсний дараа 14 дэх секундэд осолджээ.

Тодруулбал, Австралийн нутаг дэвсгэрээс тойрог замд хүрэхээр өчигдөр /07.31/ анх удаа хөөрсөн пуужин  хөөрснөөс хойших 14 дэх секундэд осолджээ.

“Эрис” нэртэй энэхүү пуужин нь "Gilmour Space Technologies" компанийн бүтээл бөгөөд жижиг хиймэл дагуулыг тойрог замд хүргэх зориулалттай, Австралид зохион бүтээж үйлдвэрлэсэн анхны хөөргөгч төхөөрөмж юм. Күйнслэнд мужийн хойд хэсэгт орших Боувэн хэмээх жижиг хотын ойролцоох сансрын буудлаас тухайн пуужинг хөөргөхийг оролджээ.

Аз болж, хүний амь нас, эрүүл мэнд хохироогүй

Австралийн мэдээллийн агентлагуудын нийтэлсэн бичлэгт, 23 метр урттай пуужин хөөргөх цамхгаас амжилттай гарч, агаарт хөөрч байснаа хэсэг хугацааны дараа унаж харагдахгүй болж буй нь бичигджээ. Хөөргөх талбайгаас утаа суунаглах дүрс ч харагдсан байна. 

Аз болж, хүний амь нас, эрүүл мэнд хохироогүй. Компани өөрийн сошиал хуудсанд мэдэгдэл хийж, энэхүү хөөрөлтийг амжилттай боллоо хэмээн үнэлжээ. Тэдний хэлснээр, хосолмол түлшээр ажилладаг дөрвөн хөдөлгүүр бүгд амжилттай ажиллаж, анхны туршилтаар хөдөлгүүр 23 секундийн турш ажилласан бол нийт 14 секунд хөөрчээ.

"Gilmour Space Technologies" нь 5 болон 7-р сарын эхээр пуужингаа хөөргөхийг төлөвлөж байсан ч техникийн саатал болон цаг агаарын таагүй байдлын улмаас хойшлуулж байжээ.

Гүйцэтгэх захирал Адам Гилмор мэдэгдэлдээ “Мэдээж илүү удаан хөөрөөсэй гэж хүссэн, гэхдээ пуужин тавцангаас амжилттай хөөрсөнд сэтгэл хангалуун байна” хэмээн LinkedIn хуудсандаа бичжээ. Тус компани өмнө нь “Пуужин газраас амжилттай хөөрвөл бидний хувьд энэ нь амжилт” гэж мэдэгдэж байсан бөгөөд хөөргөлтийн талбайн дэд бүтэц бүрэн бүтэн хэвээр үлдсэн гэжээ.

Эх сурвалж: Associated Press