Хойд Солонгосын удирдагч  Ким Жон Ун, ОХУ-ын Ерөнхийлөгч Путинтэй уулзсаны дараа Хойд Солонгосын ажилтнууд Ким Жон Ун хүрсэн бүх тавилга буюу сандал, ширээг арчиж, түүний хэрэглэсэн аягыг даруй авч явжээ. Энэ нь ДНХ-ийнх нь бүх ул мөрийг арилгах гэсэн оролдлого аж.

Хойд Солонгос, Оросын удирдагчид лхагва гарагт Бээжинд болсон томоохон цэргийн парадын дараа уулзжээ. Тэнд Хятадын дарга Ши Жиньпин улс орныхоо өсөн нэмэгдэж буй дипломат байр суурийг бусад удирдагчдад харуулсан юм.

Бичлэгт хоёр ажилтан Ким Жон Уны  сууж байсан сандлын түшлэг, суудлыг маш хурдан арчиж, өөр нэг эмэгтэй түүний хэрэглэсэн аягыг тавган дээр тавиад аваад явж буй нь харагдана.

“Хэлэлцээний дараа БНАСАУ-ын удирдагчийг дагалдсан ажилтнууд Кимийн хүрсэн бүх зүйлс дээрх ул мөрийг маш нямбай арилгасан” гэж Оросын сэтгүүлч Александр Юнашев өөрийн Telegram сувагт мэдээлжээ.

Албан ёсны хэсэг өндөрлөсний дараа Путин, Ким хоёр маш сэтгэл хангалуун өрөөнөөс гарч, илүү тайван уур амьсгалд цай уухаар явсан байна. 

Ким Жон Уны ийм “цэвэрлэгээ”-г Путиний нууц албанаас эсвэл Хятадуудаас болгоомжилж хийсэн эсэх нь тодорхойгүй ч өөрийн ДНХ-ийг хамгаалахад санаа зовдог цорын ганц удирдагч тэр биш.

Оросын удирдагчийн бие хамгаалагчид түүнийг гадаадад байх үед биеэс гадагшлуулж буй зүйлсийг нь битүүмжилсэн уутанд хийж, тусгай цүнхээр Москва руу авч явдаг гэсэн мэдээлэл байдаг.  Путины Холбооны хамгаалалтын алба (ФСО) уг үйл ажиллагааг 2017 оноос хойш хийж байгаа ба ингэснээр дайсагнагчдад түүний биеийн байдлыг ялгадаснаас нь тодорхойлох боломжийг олгохгүй байх зорилготой гэнэ.

Эх сурвалж: Daily Mail