УИХ-ын чуулганы хуралдаан үргэлжилж байна. Чуулганаар Гэр бүлийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэж эхлэв. Хуулийн төслийн танилцуулгыг ЗГХЭГ-ын дарга С.Бямбацогт танилцуулав.

ЗГХЭГ-ын дарга С.Бямбацогт:

-Гэр бүлийн тухай хуулийн шинэчилсэн найруулгын төслийг боловсруулж Засгийн газрын хуралдаанаар хэлэлцүүлэн энэ оны арваннэгдүгээр сарын 14-ний өдөр УИХ-д өргөн мэдүүлсэн.

Гэр бүл бол хүн төлөвших, хүн хүнээ гэх сэтгэл бүрэлдэн тогтох анхдагч орчин. Хүнлэг энэрэнгүй нийгэм бий болгох гол тулгуур билээ. Тиймээс Засгийн газар хүний хөгжлийг бодлогынхоо төвд тавьсан. Одоогийн хэрэгжиж буй хууль гэр бүлийн хувьсан өөрчлөгдөж буй харилцааг зохицуулж чадахгүй байгаа тул аливаа харилцааны асуудал тулгарахад хүүхэд, гэр бүлийн гишүүдийн эрхийг бүрэн хамгаалж чадахгүй, мухардмал ойлгомжгүй байдлыг үүсгэж байна.

Гэр бүлийн гишүүдийн эд хөрөнгө буюу гэр бүлийн гишүүдийн дундаа буюу хамтран эзэмших эд хөрөнгийн зохицуулалт, гэрлэлтийн гэрээ, хүйс солиулах нь гэрлэлтэд ямар үр дагавар үүсгэх, тээгч эхээр хүүхэд тээлгэх, зохиомлоор үр суулгахыг өв залгамжлалд хэрхэн зохицуулах зэрэг шинэ тутам тулгамдаж буй ээдрээт олон асуудлыг Гэр бүлийн тухай хууль бүрэн зохицуулж чадахгүй байгаа. Тиймээс хуулийн төсөлд дараах зарчмын шинжтэй өөрчлөлтийг тусгалаа.

1. Монгол Улсад гэрлэлт цуцлалт жил ирэх тусам нэмэгдэж байна. Үүний улмаас хүүхдийн эрх хамгийн их зөрчигдөж байгаа. Гэвч энэ асуудлыг хамтад нь шийдвэрлэхгүй байна. Иймд хүүхдийн тэтгэлэг, хүүхдийн асрамж, тусдаа амьдрах эцэг, эхийн хүүхэдтэйгээ уулзах асуудлыг гэрлэлт цуцлалттай хамтад нь заавал шийдвэрлэж байхаар,
2. Хүүхдийн тэтгэлгийн хэмжээг бүгдийг тэгшитгэх бус тэтгэлэг төлөгчийн хөрөнгө орлого, тэтгэлэг авагчийн хэрэгцээ шаардлагад нийцүүлэн нарийвчлан тогтоох. Хүүхдийн тэтгэлгийг сургуульд сурч байгаа 18-21 насны болон асаргаа сувилгаа шаардлагатай хөгжлийн бэрхшээлтэй хүүхдэд наснаас үл хамааран олгохоор,
3. Гэрлэлт цуцалснаас хойш хүүхэдтэйгээ уулзах эрхийг хуульчилж, хүүхэдтэй уулзуулахгүй эсвэл уулзахгүй бол Зөрчлийн тухай хуулиар албадан биелүүлж, шийтгэл оногдуулахаар,
4. Гэрлэлтийн гэрээ байгуулах нэмэлт өөрчлөлт оруулах, цуцлах бол дундын эд хөрөнгийг хуваах нөхцөлийг бүрдүүлэх,
5. Таваас доошгүй жил хамтран амьдарч, хамтран эд хөрөнгө бий болгосон. Гэвч хамтын амьдрал дуусгавар болсон тохиолдолд гэрлэгчид дундын эд хөрөнгөө хуваадагтай адилтган үзэхээр,
6. Цус ойртолтоос сэргийлж гэрлэлт бүртгүүлэхээс өмнө садан, төрлийн холбоотой эсэхээ шалгуулж болохоор,
7. Хүүхдийг үрчлүүлэх асуудлыг Засаг дарга шийдвэрлэдэг бус шүүх шийддэг байхаар,
8. Хүүхдэд асран хамгаалагч, харгалзан дэмжигч тогтоохдоо нэн тэргүүнд гэр бүлийн орчинд өсөн торних нөхцөлийг хангахаар “Асралт гэр бүл”-ийн талаар,
9. Гэр бүлээс гадуурх харилцааны улмаас гэрлэлт цуцалбал буруутай гэрлэгчээс сэтгэл санааны хохирлоо нөгөө тал нэхэмжлэх, мөн энэхүү нөхцөл байдлыг дундын эд хөрөнгөө хуваахад харгалзан үзэхээр тусгалаа. Түүнчлэн гэр бүлээс гадуурх харилцааны улмаас гэрлэлт цуцалсан бол хүүхэд нь буруутай эцэг, эхээ заавал тэжээн, тэтгэх үүрэггүй байхаар,
10. Хүйсийн өөрчлөлтийн улмаас гэрлэлт дуусгавар болох тээгч эхээр хүүхэд тээлгэхээр гэрээ байгуулсан эцэг, эхэд хүүхдийн эцэг эх байхаар, мөн өөр хүний бэлгийн эсийг ашиглан хүүхэдтэй болбол өөр хүний бэлгийн эс ашигласан гэрлэгчид хүүхдийн эцэг, эх байхаар тусгалаа.