Боловсролын салбарын цомхотголтой холбоотой мэдээлэл цахим сүлжээнд түгэв. Үүнтэй холбогдуулан Боловсролын яамнаас албан ёсны тайлбар, мэдээлэл өгөв. 

Боловсролын яамны Төрийн нарийн бичгийн дарга Х.Батжаргал “УИХ, Засгийн газрын түвшинд багшийг цомхтголд хамруулахгүй гэдгийг олон удаа мэдэгдсэн. Чиг үүргийн давхардлууд боловсролын захиргааны байгууллагуудад бий. Харин сургалтын байгууллагын хэмжээнд хэн нэгнийг чөлөөлж, цомхотгохоос зайлсхийж байгаа.

Багшийн тоонд гар хүрэхгүй. Сургууль, цэцэрлэгийн албан хаагчдын нийгмийн асуудлыг хөндөхгүй гэж ойлгож болно.

Байхгүй албан тушаалд хүн томилсон асуудал бий. Тухайлбал зарим сургууль орлогч захиралтай байдаг. Энэ бол зөрчил. Үүнийг арилгана. Багшийн тоонд гар хүрэхгүй. Сургууль, цэцэрлэгийн албан хаагчдын нийгмийн асуудлыг хөндөхгүй гэж ойлгож болно” гэлээ.

Засгийн газраас  2025 оны төсвийн тодотголын төслийг боловсруулж, олон нийтээр хэлэлцүүлж буй. Үүнтэй холбоотойгоор Боловсролын яамны Төрийн нарийн бичгийн дарга Х.Батжаргал аймаг, нийслэлийн Боловсролын газрын дарга нар болон яамны харьяа байгууллагын удирдлагуудад албан тоотоор чиглэл уламжилжээ.

Тус албан тоотоор “Засгийн газрын агентлаг, төрийн болон орон нутгийн өмчит, тэдгээрийн оролцоотой аж ахуйн нэгж, байгууллагын сул орон тоог нөхөх сонгон шалгаруулалтыг түр зогсоож, шинээр албан тушаал бий болгон орон тоо нэмэгдүүлэхгүй байх, өндөр насны тэтгэвэр тогтоолгон чөлөөлөгдсөн ажилтны орон тоог царцаан, нөхөн томилгоо хийхгүй байх” тухай чиглэлийг холбогдох байгууллагуудад хүргүүлсэн байна.

Өөрөөр хэлбэл, дээрх чиглэл нь ерөнхий боловсролын сургууль, цэцэрлэгийн багш нарын орон тоонд хамаарахгүй аж.