Дорноговь аймгийн Сайншанд сумын ...сургуулийн сурагч Д 2023 оны аравдугаар сарын 3-ны өдөр сураггүй алга болсон. Түүнийг Г гэгч этгээд автомашиндаа суулган авч явж, эзгүй газарт аваачин хөнөөсөн хэрэг гарсан. Эл хэргийг шүүхэд шилжүүлсэн бөгөөд шүүх хурлыг энэ оны гуравдугаар сарын 29-ний өдөр анхлан товложээ.

Улмаар хохирогч тал өмгөөлөгч авах хүсэлт тавьсан тул шүүх хуралдааныг хойшлуулсан байна. Шүүх хурлыг өнөөдөр зохион байгуулахаар дахин товлосон бөгөөд Дорноговь аймаг дахь сум дундын эрүүгийн хэргийн анхан шатны шүүхэд 09:00 цагт эхэллээ.

Улсын яллагч яллах дүгнэлтээ уншиж, танилцуулсан бөгөөд одоо эд мөрийн баримт, бичмэл нотлох баримтыг шинжлэн судлах ажиллагаагаар шүүх хурал үргэлжилж байна.

Эргэн сануулахад, Мөрдөн байцаах албанаас иргэн Г-д холбогдуулан 2023 оны 10 дугаар сарын 3-ны өдөр насанд хүрээгүй хүнд хүч хэрэглэж, биеэ хамгаалах, эсэргүүцэл үзүүлэх чадваргүй байдлыг ашиглаж эрхшээлдээ оруулан хүн хулгайлсан.

Улмаар 2023 оны 10 дугаар сарын 4-ний өдөр онц харгис хэрцгийгээр, өөр гэмт хэргийг нуун далдлах, хялбарчлах зорилгоор, хохирогчийн биеэ хамгаалж чадахгүй бага насны хүүхэд болохыг мэдсээр байж амь насыг нь хохироосон үйлдэлд Эрүүгийн хуулийн 10.1 дүгээр зүйлийн 2 дахь хэсгийн 2.1 зааснаар эрүүгийн хэрэг үүсгэн, яллагдагчаар татаж, мөрдөн шалгах ажиллагааг хийжээ.