УИХ-ын чуулганы өнөөдрийн хуралдаан үргэлжилж байна. Хуралдаанаар Эрхтэн, эд, эс шилжүүлэн суулгах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэх асуудлыг хэлэлцэж эхэллээ.

УИХ-ын гишүүн У.Отгонбаяр “Хуулийг дэмжиж байгаа, энэ маш чухал. Дэлхийд энэ төрлийн мэс засал маш хурдтай хөгжиж, эрчимжиж байна. Эд, эрхтэн, эс шилжүүлэн суулгах хууль эрхзүйн орчныг боловсронгуй болгох зайлшгүй шаардлага байгаа.

П.Батчулуун эмчийн асуудлыг нийгмээрээ л харлаа. Энэ асуудлыг хууль эрхзүйн зохицуулалт тааруугаас болсон гэж ойлгож байгаа. Энэ чиглэлийн зохицуулалт энэ хуульд туссан уу, өөрөөр хэлбэл амьгүй донортой холбоотой гэсэн үг.

Мөн амьгүй донорын ар гэрт хөдөлмөрийн хөлсний доод хэмжээг 10 дахин өсгөсөнтэй адилтгаж тэтгэмж олгоно гэж хуулийн төсөлд оруулжээ. Үүнийг ямар тооцоо, судалгаан дээр үндэслэн гаргасан бэ?. Үүнийг бага байна гэж бодож байна. Арав биш 100 дахин болгож болно шүү дээ. Ар гэрт нь олон хүний амь аварсан гэх бахархлыг төрүүлэх механизм чухал” гэлээ.

Үүнд хууль санаачлагч, УИХ-ын гишүүн Ж.Чинбүрэн “Үүсээд буй нөхцөл байдалтай холбоотойгоор өнгөрсөн бүтэн жилийн хугацаанд амьгүй донороос эрхтэн шилжүүлэх үйл ажиллагаа тасалдаад, гацчихаад байгаа. Нийгмийн даатгалын шимтгэл төлдөг иргэнд оршуулгын зардлыг 3 дахин нэмж өгнө гэсэн хуулийн заалттай. Гэвч тухайн олон хүнийг аварсан амьгүй донор ажил эрхэлдэггүй байсан тул тайтгарлын тэтгэмж өгөх боломжгүйд хүрч, том асуудал үүссэн.

Тэгэхээр энэ хуульд амьгүй донор нь нийгмийн даатгалын шимтгэл төлдөг байсан эсэхээс үл хамааран тайтгарлын буюу оршуулгын тэтгэмж олгоно гэж тусгасан, үүнийг гаргалгаа гэж харж байгаа. Харин оршуулгын зардлын тооцооллыг оршуулгын зардалд үндэслэн гаргасан. Хүний эд, эрхтнийг наймаалах боломж Монгол Улсад байхгүй. Тэгэхээр эд, эрхтнийг нь авч амьгүй донор болгосны хариуд ямар нэг урамшуулал өгч авч болохгүй. Тиймээс ядаж тайтгарлын зардлыг нь даадаг байя гэдэг том бодлого одоо хэрэгжиж байгаа. Амьгүй донор болгочихъё гэдэг сэдлийг бид өдөөж болохгүй юм” гэлээ.