УИХ-ын чуулганы хуралдаан үргэлжилж байна. Хуралдаанаар Үндэсний их баяр наадмын тухай хуульд нэмэлт өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийг хэлэлцэх эсэх хэлэлцүүлгийг хийж байна.

УИХ-ын дарга С.Бямбацогтод Улсын Их Хурлын гишүүн П.Сайнзориг, О.Алтангэрэл, Д.Ганмаа, С.Зулпхар, Г.Хосбаяр, Д.Цогтбаатар нар Үндэсний их баяр наадмын тухай хуульд нэмэлт, өөрчлөлт оруулах тухай хуулийн төсөл өргөн /2026.05.28/ мэдүүлсэн.

Үндэсний их баяр наадмын тухай хуулийн 9 дүгээр зүйлийн 9.1 дэх хэсэгт “Улсын баяр наадамд 10 жил тутам Их Монгол Улс байгуулагдсаны болон Ардын хувьсгалын тэгш ойг давхцуулан 1024 бөх, бусад баяр наадамд 512 бөх барилдана.” гэж заасан. Энэхүү зохицуулалт нь 10 жил тутамд 1024 бөхийг Үндэсний их баяр наадмаар барилдуулж, цолны үнэлэмжийг дээшлүүлэх, түүх, соёлын асуудалд ач холбогдол өгч буй хэрэг гэдгийг төсөл санаачлагч гишүүн П.Сайнзориг энэ үеэр тодотгосон юм.

Мөн тэрбээр энэ жил Их Монгол Улс байгуулагдсаны 820 жилийн ой тохиож буй тул үүнийг ёслол төгөлдөр, өргөн дэлгэр тэмдэглэх нь зүйтэй гэж үзэж Улсын Их Хурлын 18 гишүүнээс уг хуулийн төслийг боловсруулан өргөн мэдүүлж байгаа нь энэ хэмээсэн.

УИХ-ын гишүүн Р.Эрдэнэбүрэн:

-Хэд хэдэн санал байна. Бүх шатны Засаг дарга зэрэг наадмын нээлт, хаалт хийж байгаа эрх мэдэлтэй хүмүүс зөвхөн Их Монгол Улс байгуулагдсаны ойг л дурддаг болмоор байна. Зарим үед Ардчилсан хувьсгалын ойг дурддаг, зарим үед орхидог.  Ингээд маргаан үүсдэг. Тиймээс зөвхөн Их Монгол Улс байгуулагдсаны ойг л хэлдэг болъё.

Хоёрдугаарт аймаг, сумын бүх наадмаар намуудын гэр барьдгаа больё. Наадам болж байгаа юм уу, сонгууль юм уу гэдэг нь мэдэгддэггүй. Ирж байгаа гаднын зочид ойлгох юм уу, үүнийг. Гуравдугаарт, УИХ-ын гишүүд өөрийн нэр дээр морь уралдуулахаа больё. Наадмыг төр зохион байгуулдаг. Гэтэл зохион байгуулагчид өөрсдөө морь уралдуулаад байхаар янз бүрийн луйвар, булхай ярихаас өөр аргагүй. Үүнээс гарах хэрэгтэй. Хууль санаачлагч энэ талаар юу гэж бодож байна вэ?.