Төрийн албаны зөвлөлийн гишүүдийн бүрэн эрхийн хугацаа дууссантай холбоотойгоор Л.Золзаяа, Б.Төгсцэнгэл, Ц.Амартөгс нарыг гишүүдээр томилох эсэхэд нууц санал хураалт явуулсан. Гишүүдийн олонх дэмжсэн тул тэднийг Төрийн албан зөвлөлийн гишүүнээр томилсонд тооцсон юм.

УИХ-ын чуулганы хурлаар Б.Түвшин нарын 41 гишүүн өргөн мэдүүлсэн Нийгмийн даатгалын ерөнхий хуульд нэмэлт, өөрчлөлт оруулах тухай хуулийн төслийг хэлэлцэх эсэх хэлэлцүүлгийг хийж байна. 

Энэ талаар УИХ-ын гишүүн Б.Түвшин "Ажлын байр, иргэдийн бодит орлогыг нэмэгдүүлэх, ажил олгогчийг ажлын байраа нэмэгдүүлэх сэдлийг нь хангах гэсэн гурван үндсэн заалт бий" хэмээн танилцуулсан.

Хуулийн төсөлд, ажил гүйцэтгэх, хөлсөөр ажиллах болон тэдгээртэй адилтгах гэрээний орлогыг нийгмийн даатгалын шимтгэл ногдох орлогоос хасах, эдгээр гэрээний үндсэн дээр хүнийг ажиллуулж, цалин хөлс олгосон бол тухайн хугацаанд ногдох нийгмийн даатгалын шимтгэлийг ажил олгогчоор нөхөн төлүүлэх, мөн хоол, унаа, орон сууцны ашиглалтын төлбөр, түлээ, нүүрсний мөнгийг нийгмийн даатгалын шимтгэл ногдох орлогоос хасахаар заажээ. 

Энэхүү хуулийн төслийн заалтууд хэрэгжвэл төсөвт ямар нөлөө үзүүлэх талаар Сангийн сайд Б.Жавхлан танилцуулав. Тэрбээр

• Хоол, унааны хөнгөлөлтөд шимтгэл ногдуулахгүй байвал 891 тэрбум,
• Ажил олгогчийн шимтгэл төлөх цалин хөлсний дээд хязгаар тогтоовол 175 тэрбум,
• Гэрээт ажилчны шимтгэлийг чөлөөлбөл 127 тэрбум 

нийт 1 их наяд 197 тэрбум төгрөгөөр Нийгмийн даатгалын сангийн орлого буурна. Иймд зарлагаа 20 хувиар бууруулах эсвэл энэ хэмжээгээр санд төсвөөс татаас олгох буюу татвар төлөгчдийн нуруун дээр ачаалал ирэх эрсдэл үүсэхээр байна. Иймд хуулийн төслийг дэмжих боломжгүй байна" гэв.

Харин Засгийн газраас удахгүй оруулж ирэх багц хуулийн өөрчлөлттэй нэгтгэн, аль нэг талд нь шингээж өргөн барих саналтай байна гэлээ. 

Гэр бүл хөдөлмөр нийгмийн хамгааллын яамны Төрийн нарийн бичгийн дарга Л.Мөнхзул ажилтны хоол, унааны мөнгөнөөс нийгмийн даатгалын шимтгэл тооцохгүй байснаар гарах үр дүнг танилцууллаа. 

Тэрбээр "НДШ-ийн орлогыг өөрчилбөл тэтгэврийн хэмжээнд гарах нөлөөллийг зайлшгүй тооцоолох ёстой. Хэрэв шимтгэлийн хэмжээг бууруулбал тэтгэвэрт гарахаар бэлтгэгдэж байгаа хүний цалин буурна. Улаанбаатар хотын жишгээр 20 мянган төгрөгийн хоол, унааны мөнгийг хасвал 1 даатгуулагчийн тэтгэврийг 230 мянган төгрөгөөр бууруулах шаардлагатай" гэв.