УИХ-ын чуулганы өнөөдрийн хуралдаан эхэллээ. Өнөөдрийн хуралдаанаар дараах асуудлыг хэлэлцэх товтой байна. Үүнд:

• Монгол Улсын Засгийн газар, Бүгд Найрамдах Казахстан Улсын Засгийн газар хоорондын тэтгэврийн асуудлаар хамтран ажиллах тухай хэлэлцээрийг соёрхон батлах тухай хуулийн төсөл /Засгийн газар 2025.05.09-ний өдөр өргөн мэдүүлсэн, соёрхон батлах/
• Хууль тогтоомжийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүд /Улсын Их Хурлын гишүүн Д.Цогтбаатар нарын 9 гишүүн 2025.01.23-ны өдөр өргөн мэдүүлсэн, анхны хэлэлцүүлэг, асуулт, хариулт 90 минут/
• Цусны донорын тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Ж.Чинбүрэн нарын 4 гишүүн 2025.03.31-ний өдөр өргөн мэдүүлсэн, хэлэлцэх эсэх, асуулт, хариулт 120 минут/
• Эрхтэн, эд, эс шилжүүлэн суулгах тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Ж.Чинбүрэн нарын 4 гишүүн 2025.03.31-ний өдөр өргөн мэдүүлсэн, хэлэлцэх эсэх, асуулт, хариулт 120 минут/
• Монгол Улсын нэгдсэн төсвийн 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуулийн төсөл болон хамт өргөн мэдүүлсэн тогтоолын төсөл /Засгийн газар 2025.04.30-ны өдөр өргөн мэдүүлсэн, анхны хэлэлцүүлэг, асуулт, хариулт 120 минут/

УИХ-ын чуулганы өнөөдрийн хуралдаан эхэллээ. Хуралдаанаар  Монгол Улсын Засгийн газар, Бүгд Найрамдах Казахстан Улсын Засгийн газар хоорондын тэтгэврийн асуудлаар хамтран ажиллах тухай хэлэлцээрийг соёрхон батлах тухай хуулийн төсөл /Засгийн газар 2025.05.09-ний өдөр өргөн мэдүүлсэн, соёрхон батлах/-ийг хэлэлцэж байна.

УИХ-ын гишүүн А.Ариунзаяа:

-Хэлэлцээрийг дэмжиж байгаа. Энэхүү хэлэлцээрийг 2014 онд цуцлах саналыг Казахстан улсын Засгийн газраас ирүүлснийг хүлээн авсан. Одоо эргэн сэргээж, УИХ-аар оруулж ирж байгаа нь сайн хэрэг. Ингэснээр хоёр орны иргэд амьдарч, ажиллаж буй тухайн улс орондоо тэтгэврээ тогтоолгох боломжтой сайн хэлэлцээр юм. Ач холбогдлыг нь олж хараасай гэж хүсэж байна.

УИХ-ын гишүүн С.Зулпхар:

-Нийгмийн хамгааллын хэлэлцээрийг өнөөдрийн байдлаар 6 улстай байгуулсан. Казахстан 7, найм дахь нь Австри болох байх. Ийнхүү монголчууд олноор суралцдаг, ажил хийдэг улс орнуудад иргэдийнхээ нийгмийн хамгааллын тогтолцоог бүрдүүлэх чухал алхам. Тэр утгаараа энэ нь чухал туршлага болж байгаа.