Хүүхэд, гэр бүлийн хөгжил, хамгааллын ерөнхий газрын баг Хүй долоон худагт ажиллаж байна. 

Тус газрын Хамгааллын бодлогын хэрэгжилтийн газрын дарга  н.Бадамцэцэг: Дөрвөн насны морь уралдлаа. Хүүхдийн хамгаалал, хувцас, хамгаалах хэрэгслийг хянах, аюулгүй байдлыг хангахаар хүүхдийн байгууллагууд ажиллаж байна.     
    
Өчигдөр (2026.07.10) Хүй 7 худагт 60 орчим ажилтан, Төв цэнгэлдэх хүрээлэнд 40 орчим хүн тус тус хяналт тавьж ажиллав. Энд бид уралдаанч хүүхдийн аюулгүй байдалд илүүтэй анхаардаг. Хувцасны хувьд өмсгөлийн хувьд боломжийн болжээ. Уяачид хүүхдүүдэд стандартын хувцас өмсүүлжээ.

Энэ жил бид уралдаанч хүүхдэд стандартын гутал өмсүүлэх гэж нэлээн шахаж ажилласан. Өмдний шуумгаа скочдоод пүүзтэй уралддаг байв. Иймд энэ жилээс шагай далдалсан пүүз өмсөхийг зөвшөөрсөн. Гараанд шалгахад стандартын бус гуталтай хүүхдүүд байна. 

Уралдааны замд хүүхдийн анхаарлыг сарниулах эрсдэлтэй тул гар утас, холбооны станцыг хориглодог. Ташуур гэхэд нэг метрээс уртгүй байх ёстой. Гэтэл үүнээс урт ташууртай иржээ. Дуслын тариур цөөн хүүхдээс хураалаа. Уяачид үүнд анхаараач ээ. Та нарт хэрэгтэй байж болно, хүүхдэд аюултай. 

Уяач нь хаана явж байна гээд дуугарахад хүүхдийн өвөрт холбооны станц байвал хүүхэд аваад хариу өгөх үед анхаарал нь сарнина. Замаа харах уу? Морио харах уу? Өөрийгөө бодох уу? Өнөөдөр 30-аад станц хураалаа. Энэ жил сэрвээг шинэ төхөөрөмжөөр хэмжиж байгаа тул уяачид нь хүүхдүүдийг бид шалгасны дараа дагаж орлоо. Сэрвээний өндрийг шалгах үеэр тэд нийлсэн гэсэн үг. Морины комиссоос хүүхдийг дахин шалгахгүй гэсэн шаардлага тавьсан. 

Өчигдөр хязаалан насны морьдын уралдаанаар 9 хүүхэд унасан. Шүдлэнг санамсаргүй байдлаар, гараан дээр дахин шалгахад 20 орчим станц, дуслын тариа, бүр 2-3 метр урт, суран ташуур, шилбүүр хураасан. Морин спорт, уяачдын холбоо цаашид үүнд анхаарна уу. Мэргэжлийн холбоо хүүхдийн байгууллагатай хамтарч, хүүхдийн аюулгүй байдлыг хангах хэрэгтэй байна.

Өнөөдөр миний морь хурдалж байна уу гэхээс илүүтэй ирээдүйн хүүхдийнхээ эрүүл мэндийг бодооч ээ гэв.