Тулгар Төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ойн баяр наадмын Хурдан морины уралдаан шүдлэн насны морьдын уралдаан боллоо. 

Уралдаанд Төв аймгийн Заамар сумын уяач Ж.Түмэн-Өлзийгийн хурдан бор үрээ торгон жолоогоо өргүүллээ. Хурдан бор үрээг 51 дугаартай Н.Боорчи хүү унаж уралдсан юм. 

Дөрөв дэх жилдээ улсын наадамд хурдан морь унаж буй 9 настай Н.Боорчи хүү "Ирээдүйн түмэн эхэд даагатай түрүүлээд, Манзушир кап-д даагатай түрүүлж, шүдлэнтэй айрагдсан. Хангарьдад даагатай түрүүлсэн. Өчигдөр Төв аймгийн уралдаанд шүдлэнтэй түрүүлж, эрлийз дундад айргийн гуравт орсон. Өглөө хязааланд хэмжээндээ хасагдчихсан. Би маргааш их нас унана" хэмээн сэтгэгдлээ хуваалцлаа. 

Ааваасаа морь унаж болох уу хэмээн асууж хурдан морь унаж эхэлсэн 9 настай хүү анх удаа улсын наадамд оролцож ийнхүү түрүү хүртжээ. Бор үрээгээ түрүүлүүлсэн уралдаанч хүүгийн сэтгэгдэл "маш хөөрхөн" байгаагаа хэлсэн бөгөөд дөрвөн жил наадамд уралдахдаа түрүү магнайгаас эхлээд айргийн таван байрыг тавууланг нь авч байжээ.