УИХ-ын чуулганы хуралдаан үргэлжилж байна. Хуралдаанаар Үндэсний их баяр наадмын тухай хуульд нэмэлт өөрчлөлт оруулах тухай хуулийн төсөл болон хамт өргөн мэдүүлсэн хуулийн төслийг хэлэлцэх эсэх хэлэлцүүлгийг хийж байна.

УИХ-ын гишүүн П.Сайнзориг:

-Монголчууд жилд 16 өдөр бүх нийтээр амарч байна. Цагаан сар, Үндэсний их баяр наадмын амралтаа уужуухан болгоод бусад амралтыг цөөлмөөр санагддаг. Цагаан сар, Наадам бол ах дүү, ураг саднаараа уулзаад мэнд усаа мэдэлцээд, хэний хүүхэд хаана явааг мэдэх баяр юм болов уу гэж боддог. Аав хүний хувьд заримдаа санаа зовдог, хүүхдүүддээ ах дүүгээ сайн танилцуулж амжаагүй явтал хоорондоо гэрлэх хэмжээнд хүрэх вий гэдэг болгоомжлол Үндэсний аюулгүй байдлын хүрээнд яригдаж байгаа.

Тэгэхээр Үндэсний их баяр наадам, Цагаан сараар уужуу амардаг байя. Жилдээ 16 хоног бүх нийтээр амарч байгаа өдрийг Цагаан сар, Наадамдаа хуваавал гэж боддог. Гэхдээ үүнийг энэ хуулиар оруулж ирээгүй.