Италийн ерөнхий сайд Жиоржиа Мэлонигийн царайг порно бичлэгт эвлүүлэн ашигласан байна. Бичлэгийг deepfake гэх аргаар, Мэлони Ерөнхий сайд болохоос өмнө хийж, 2020 онд интернетэд байршуулжээ.

73 настай аав, 40 настай хүү бичлэгийг эвлүүлж, Италийн Сардинийн арлаас Америкийн нэгэн цахим хуудсанд оруулсныг тогтоожээ.

Ерөнхий сайд Жиоржиа Мэлони ирэх долдугаар сард тус арал руу очиж, мэдүүлэг өгнө. Түүний өмгөөлөгч “Бичлэг хийсэн этгээдүүд миний үйлчлүүлэгчийн нэр төрд халдсан тул 100 мянган евро нэхэмжиллээ. Гэхдээ энэ мөнгийг Дотоод хэргийн яамны дэргэдэх, эмэгтэйчүүдийг хүчирхийллээс хамгаалах санд хандивлана. Яагаад шүүхэд гомдол гаргасан гэхээр энэ төрлийн хохирогч болсон эмэгтэйчүүд айлгүйгээр, шүүхэд гомдлоо зоригтойгоор гаргадаг байгаасай гэж хүсэж, тэднийг уриалах зорилготой” гэжээ.

Ерөнхий сайдын нүүрийг бусдын бие дээр эвлүүлсэн бичлэгийг олон сая хүн үзжээ. Гомдол гаргасны дагуу бичлэгийг интернетээс устгасан байна.

Эх сурвалж: BBC