УИХ-ын чуулганы хуралдаан /2026.04.03/ эхэллээ.

Чуулганы хуралдаанаар Улсын Их Хурлын гишүүн Б.Пүрэвдорж нарын 4 гишүүнийн өргөн мэдүүлсэн Онцгой албан татварын тухай хуульд өөрчлөлт оруулах тухай хуулийн төслийг хэлэлцэх эсэх хэлэлцүүлгийг хийж байна. 

Хууль санаачлагчдын зүгээс 2015 онд онцгой албан татварын хувь хэмжээг 400 мянган төгрөг, дизель түлшийг 520 мянган төгрөг болгон тогтоосноос үүдэж, завсрын бүтээгдэхүүний эрэлт нэмэгдэж, уг бүтээгдэхүүнд онцгой албан татвар, тусгай зөвшөөрөл шаардахгүй байгаа нь хуурамч шатахуун үйлдвэрлэх гол шалтгаан гэж үзжээ.

ШУУД ҮЗЭХ:

Хэлэлцэж буй асуудалтай холбоотойгоор УИХ-ын гишүүд асуулт асууж, хариулт авлаа.

УИХ-ын гишүүн Х.Баасанжаргал "Яг энэ заалтыг Үндсэн хуулийн цэцээс Үндсэн хууль зөрчсөн гэж дүгнээд УИХ хүлээж авч байжээ. Гэхдээ холбогдох зохицуулалтыг хийгээгүй аж. Ийм байхад бид ийм заалтыг дахин хэлэлцэх нь зөв үү? 

Хоёрдугаарт, хуулийн төсөлд татвартай болгох гэж буй бүтээгдэхүүнд керосин орж ирээгүй байна. Жинхэнэ хуурамч шатахуун үйлдвэрлэх үндэслэл нь керосин биш үү?" гэсэн асуултыг тавив. 

Түүний асуултад УИХ-ын гишүүн Б.Пүрэвдорж "Энэ хууль байнга өөрчлөгдөж байдаг. Миний өргөн барьсан хууль 2021 онд батлагдаж, 2023 онд хүчингүй болсныг тус ондоо дахин өргөн барьж байсан. 

Керосин хасагдана гэж байхгүй. Өргөн мэдүүлсэн хуулийн төсөлд энэ керосин орсон. Тараагдсан материал дээр байхгүй байвал би нэмж оруулахад асуудалгүй. 

Үндсэн хуулийн цэц дээр энэ заалт нь шатахуун талаасаа орж ирээгүй, бизнесийн өрсөлдөөнийг хэтэрхий хязгаарласан гэдэг зүйлээр орж ирсэн юм. Үндсэндээ ҮХЦ-ийг авлигадаж, өнгөрсөн парламент миний хуулийг увайгүйгээр унагасан гэдгийг хэлье" гэв.

Онцгой албан татварын тухай хуульд өөрчлөлт оруулах тухай хуулийн төслийг хэлэлцэх эсэхийг хуралдаанд оролцсон гишүүдийн 58.3 хувь нь дэмжлээ. Ингэснээр төслийг анхны хэлэлцүүлэгт бэлдүүлэхээр Төсвийн байнгын хороонд шилжүүлэв. 

Үдээс өмнөх хуралдаанаар хэлэлцэх асуудал дууссан тул чуулганы хуралдаан түр завсарлалаа.