Өнгөрч буй долоо хоногт болсон үйл явдлаас онцлон тоймлон хүргэж байна. 

Томуугаар өвчилсөн хүүхдүүдийн 60-70 хувь нь вакцин хийлгээгүй байна

Нийслэлд цэцэрлэг, сургуулийн хүүхдүүдийн дунд томуу дэгдэж, эмнэлгүүдийн ачаалал эрс нэмэгдэж, нэмэлтээр ор дэлгэж эхэллээ. Улмаар өвчлөл их байгаа сургуулиудын үйл ажиллагааг /бага, дунд анги/ цахимаар явуулах шийдвэрийг Боловсролын сайд гаргав. Томуугаар өвчилсөн хүүхдүүдийн нөхцөл байдлыг харахад 60-70 хувь нь вакцин хийлгээгүй байна хэмээн Эрүүл мэндийн сайд мэдээлсэн.

Ерөнхий боловсролын сургуулийн бага, дунд ангийн сурагчид дараах хугацаанд цахимаар хичээллэнэ.

• 1–5 дугаар ангийн хичээл 2025 оны 12 дугаар сарын 1-нээс 5-ныг дуустал,
•  6–9 дүгээр ангийн хичээл 2025 оны 12 дугаар сарын 8-наас 12-ныг дуустал цахимаар явагдана.

Гэвч, нөгөө талдаа улирлын ханиад томуу гарах нь байдаг л үзэгдэл ч тэр бүрд хичээлийн хэвийн үйл ажиллагааг тасалдуулж байгааг зарим эцэг эх шүүмжиллээ. Учир нь багш нарын ажил хаялтаар хоцрогдолд орсон хүүхдүүд дахиад хоцрох, 1-5-р ангийн хүүхдүүдийг гэрт нь хэн цахим хичээлийг нь давтуулах вэ гэх зэрэг асуудлууд урган гарах юм. 

Тэргүүн Шадар сайд бөгөөд Эдийн засаг, хөгжлийн сайдад Ж.Энхбаярыг, ХХААХҮ-ийн сайдаар М.Бадамсүрэнг тус тус томиллоо

Шадар сайд бөгөөд Эдийн засгийн хөгжлийн сайд Н.Учрал УИХ-ын даргаар сонгогдсонтой холбоотойгоор уг албан тушаалд:

• ХХААХҮ-ийн сайд асан Жадамбын Энхбаярыг Шадар сайд бөгөөд Эдийн засгийн хөгжлийн сайдад
• ХХААХҮ-ийн сайдад УИХ-ын гишүүн Мягмарсүрэнгийн Бадамсүрэнг томиллоо. Кабинетын сайд нараа томилох, чөлөөлөх нь Ерөнхий сайдын бүрэн эрхийн асуудал боловч бүлгийн хуралд танилцуулсан байна.

УИХ-ын чуулганаар шинэ томилгоо, Тамхины тухай нэмэлт хууль, "Шатахууны нөөц сав"-ны тухай хуулийг хэлэлцэв

Үндсэн хуулийн цэцийн гишүүн Л.Өлзийсайханыг үүрэгт ажлаас нь чөлөөлж Улсын Их Хурлын Ерөнхий нарийн бичгийн даргыг томилох тухай асуудлыг УИХ-аар хэлэлцэж Лувсандоржийн Өлзийсайханыг хуралдаанд оролцсон гишүүдийн 61.3 хувь нь дэмжжээ. 

Тамхины хяналтын тухай хуульд нэмэлт, өөрчлөлт оруулах тухай хуулийн төслийг хэлэлцлээ. Монгол Улс анх 1993 онд Тамхины хор хөнөөлтэй тэмцэх тухай хуулийг баталж, 2005 онд уг хуулийг шинэчлэн найруулж, одоогийн хүчин төгөлдөр мөрдөж буй Тамхины хяналтын тухай хуулийг баталжээ. 2024 оны байдлаар Монгол Улс дахь тамхины хэрэглээ нийт хүн амын 28.4 хувьд хүрсэн нь ДЭМБ-ын Номхон далайн баруун бүсийн хэмжээнд хамгийн өндөр үзүүлэлттэй орны 7 дугаарт орж байна. Монгол Улсад жил бүр тамхинаас шалтгаалсан 4,300 орчим нас баралт бүртгэгдэж, өсвөр насныхны дунд электрон тамхины хэрэглээ уламжлалт тамхины хэрэглээнээс давж гарсан буюу 13-17 насны дөрвөн сурагч тутмын нэг нь электрон тамхи татаж байна гэсэн статистик үзүүлэлт байна.

Стратегийн ач холбогдол бүхий бүтээгдэхүүний хангамж нийлүүлэлтийг дэмжих тухай хуулийн төслийн талаар хэлэлцэв. Энэ нь угтаа шатахуун хадгалах нөөц сав барих хуулийн төсөл ба ААН-үүдэд хөнгөлөлттэй зээлээр хэрэгжүүлэх юм. Хууль санаачлагч нь АҮЭБ-ын сайд Г.Дамдинням ба зургаан сарын хэрэглээгээ хангадаг хэмжээнд хүрнэ гэвэл бараг 3 их наяд төгрөг хэрэг болно. Нэг сарын хэрэглээний нөөцөө хадгалъя гэвэл 200 мянган тонн шатахуун хадгалах савыг барихад 500 тэрбум орчим төгрөгийн эх үүсвэр хэрэгтэй ба үүнийг аж ахуй нэгжүүд 1,5-2 жилд барина гэв. Харин түүний хуулийн төслийг гал унтраасан, түүхий хэмээн Б.Жаргалан гишүүн шүүмжлээд "Импортын түлшнээс хараат бус байдлаа шийдэхгүй, богино хугацаанд гал унтраах аятай аргацаагаад байна. Цаашдаа энэ нөөц савыг яах вэ гэдэг нэг асуудал байна. "Шатахуун тасалдлаа" гээд байсан. Г.Дамдинням сайд тухайн үед тасалдаагүй л гээд байсан. Яг үнэндээ ийм хууль оруулж ирэх гээд зориудаар хомсдол үүсгээд байна уу гэж хардаж байна" гэсэн юм.

Улс тунхагласны баяр тохиолоо

Монгол Улс анхдугаар Үндсэн хуулиа баталж, Бүгд Найрамдах Улсаа тунхагласны 101 жилийн ойн баяр энэ лхагва гарагт тохиолоо. Эл өдөр зохион байгуулсан хүчит 128 бөхийн уламжлалт барилдаанд Архангай аймгийн Хашаат сумын харьяат, улсын заан Сүхбаатарын Сүхбат хоёр дахь удаагаа түрүүллээ.

Мөн Монгол Улсын Ерөнхийлөгч Ухнаагийн Хүрэлсүх нэр бүхий эрхмүүдэд төрийн дээд цол, одон, медаль хүртээлээ. Тэднээс онцолбол, Хөдөлмөрийн баатар цолыг:
Шинжлэх ухаан, боловсролын салбарт үр бүтээлтэй ажиллаж, олон арван нэг сэдэвт эрдэм шинжилгээний бүтээл, олон зуун өгүүлэл, заавар, зөвлөмж, гарын авлага боловсруулж, биологийн салбарын мэргэжилтэй хүний нөөц бэлтгэх, Монгол орны загасны аймаг, ус нуурын биологийн олон янз байдал, загас, амьтан, ургамлыг нөхөн үржүүлэх шинжлэх ухааны аргачлал боловсруулан, загас үржүүлгийн эрдэм шинжилгээний төвийг үндэслэн байгуулж, боловсрол, шинжлэх ухааны салбарын хөгжилд оруулсан хувь нэмрийг нь үнэлэн Шинжлэх ухааны гавьяат зүтгэлтэн, Шинжлэх ухааны доктор, профессор, академич Аюурын Дулмаад цол хүртээж, “Алтан соёмбо” тэмдэг, Сүхбаатарын одонгоор шагналаа.

Аюурын Дулмаа нь Хөвсгөл, Дархадын хотгорын Цагаан нуур, Төгрөг, Хармай, Тарган, Монгол Алтайн Толбо, Хонгор-Өлөнгийн нуур, хангайн Улаагчины хар, Найман нуур, Бага, Жаахан нуур, Дорнод тал хээрийн Хөх, Сүхбаатар аймгийн Ганга, Дагшин, Зэгст зэрэг найман аймгийн 25 нууранд загас нутагшуулан үржүүлсэн. Ингэснээр жилд 50-340 тн загас барих нөөцийг улсдаа бий болгосон  юм.

30-ны ням гарагаас эхлэн хүйтний эрч эрс чангарна

Цаг уур, орчны шинжилгээний хүрээлэнгээс энэ сарын 30-наас ихэнх нутгаар хүйтний эрч эрс чангарахыг анхаарууллаа.

Энэ үеэр Дархадын хотгор, Завхан, Заг-Байдраг голын эх, Идэр, Тэс голын хөндийгөөр шөнөдөө -39…-44 градус, өдөртөө -21…-26 градус, Алтай, Хангай, Хөвсгөл, Хэнтийн уулархаг нутаг, Хараа, Ерөө, Туул, Тэрэлж, Хэрлэн голын хөндийгөөр шөнөдөө -30…-35 градус, өдөртөө -15...-20 градус.

Хангайн нурууны өвөр бэл, говийн бүс нутгийн баруун өмнөд хэсгээр шөнөдөө -15…-20 градус, өдөртөө -5…-10 градус, бусад нутгаар шөнөдөө -20…-25 градус, өдөртөө -10…-15 градус хүйтэн байна.

"Physical Asia" шоуны гаднын зарим оролцогч Монголд зочиллоо

Монголчуудыг огшоож, дэлгэцийн урд хэсэгтээ уясан Netflix-ийн шоу болох Physical Asia тэмцээний зарим оролцогч Монгол оронд зочлон иржээ. Тодруулбал Physical Asia шоу тэмцээнд өрсөлдсөн Австралийн багийн тамирчин Доминик Ди Томмасо /Дом Томато/ Монголд иржээ. Тэрбээр ирсэн өдрийнхөө маргааш нь мандах нарнаар Сүхбаатарын талбайд очсон байна. Харин түүнээс өмнө Монголд ирсэн, тус шоуны оролцогч БНСУ-ын тамирчин, Жан Ын Шил Чингис хааны Үндэсний музейд зочилж, Чингисийн хөшөөтэй танилцаж буй талаараа өөрийн сошиал платформд нийтэлжээ. Мөн тэрбээр Цонжинболдогт зочилж, жүдогийн дэвжээнд А.Адъяасүрэнгийн хамт бэлтгэл хийжээ. 

Сонирхуулахад, тун удахгүй Австралийн багийн тамирчин Эдди болон БНСУ-ын тамирчин Амотти нар Монголд ирэхээ мэдэгдээд байгаа билээ. 

Эхнэрээ хөнөөсөн гэмтний ялыг хэвээр үлдээж, эхнэрээ хүчирхийлж зодсоныг нь дахин баривчиллаа

НИТХ-ын төлөөлөгч Б.Эрдэнэсүх гэр бүлийн хүчирхийлэл үйлдсэн байж болзошгүй хэрэгт холбогдон шалгуулж буй. Түүнд Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.4 дэх заалтад заасан “урьд нь авсан таслан сэргийлэх арга хэмжээг зөрчсөн...” гэх үндэслэлээр яллагдагчаар цагдан хорих таслан сэргийлэх арга хэмжээ авах тухай прокурорын санал нь үндэслэлтэй байна гэж үзсэн тул цагдан хорих таслан сэргийлэх арга хэмжээ авах тухай прокурорын саналыг хүлээн авч, хангаж шийдвэрлэжээ. Өөрөөр хэлбэл түүнийг дахин цагдан хорьжээ. 

Харин эхнэрээ хөнөөсөн Н.Энхбатад анхан шатны шүүхээс бүх насаар нь хорих ял оноож, ялыг хаалттай хорих байгууллагад тусгаарлаж эдлүүлэхээр тогтоож, шүүгдэгч Н.Энхбатаас сэтгэцийн хохирол хор уршгийн зардалд 162,360,000 (нэг зуун жаран хоёр сая гурван зуун жаран мянга) төгрөгийг гаргуулж, амь хохирогчийн төрсөн хүүхэд Э.Д-д олгохоор шийдвэрлэсэн. Улмаар Н.Энхбат давж заалдсан бөгөөд Нийслэлийн Эрүүгийн хэргийн давж заалдах шатны шүүхээс анхан шатны шүүхийн шийтгэх тогтоолыг хэвээр үлдээжээ.