ИНТЕРАКТИВ ХИЧЭЭЛИЙН 104 ЖИШИГ КОНТЕНТИЙГ АМЖИЛТТАЙ ХИЙГЭЭД БАЙНА

КОВИД-19 цар тахлын улмаас сургуулийн өмнөх насныхан болон ерөнхий боловсролын сурагчид 2019-2020, 2020-2021 оны хичээлийн жилүүдэд 12 долоо хоногийг танхимаар, 20 долоо хоногийг танхимын бус буюу теле болон цахим хэлбэрээр хичээллэжээ. 

Цар тахлын үед теле хичээлээс гадна дэлхийн боловсролын чиг хандлагад нийцүүлж цахим сургалтын контент буюу хичээлийг хүүхдийн оролцоо, бүтээлч чадварыг нь дэмжсэн интерактив хэлбэрээр хүргэх нэн шаардлагатай болсон юм.

Тиймээс Монгол Улсын Засгийн газрын дэмжлэг, Боловсрол, шинжлэх ухааны яамны захиалга, “КОВИД-19 цар тахлын хүрээнд боловсролын салбарын суурь үйлчилгээг дэмжих" НҮБ-ын нэгдсэн төсөл болон Япон Улсын Засгийн газрын санхүүжилтээр сургуулийн өмнөх болон ерөнхий боловсролын сургалтын хүрээнд хүүхдийн оролцоог дэмжсэн, сонирхолтой, интерактив байдлаар хүргэх 104 жишиг контентийг амжилттай бүтээлээ. 

Энэхүү хамтарсан хөтөлбөр нь:

• Нидерландын Вант Улс
• Данийн вант Улс
• Швейцарын Холбооны Улс
• Норвегийн Вант Улс
• Шведийн Вант Улс
• Бүгд Найрамдах Солонгос Улс
• Бүгд Найрамдах Финланд Улс
• Шинэ Зеланд Улс
• Хорватын Бүгд Найрамдах Улс
• Бүгд Найрамдах Исланд Улс
• Тайландын Хаант Улс
• Бүгд Найрамдах Словак Улс
• Камбожийн Вант Улсын Засгийн газруудаас тус тус НҮБ-ын Хариу арга хэмжээ, Нөхөн сэргээх санд оруулсан хандивын дэмжлэгтэйгээр хэрэгжсэн болно.

Хамтран ажиллагч байгууллагууд:

• Боловсрол, шинжлэх ухааны яам
• НҮБ-ын Хүүхдийн Сан
• НҮБ-ын Хүн Амын Сан
• НҮБ-ын Боловсрол, Шинжлэх ухаан, Соёлын Байгууллага
• Багшийн мэргэжил дээшлүүлэх институт (БМДИ)
• "Монгол Контент" ХХК

Интерактив хичээл бүрийг монгол, казах, тува, дохионы хэлний сонголттой хүргэхээс гадна контент бүтээгчид харааны бэрхшээлтэй хүүхдүүдэд зориулсан жишиг хичээлийг мөн бэлтгээд эхэлжээ. Өөрөөр хэлбэл, эдгээр нь үндэсний цөөнх болон тусгай хэрэгцээт хүүхдүүдийн хэрэгцээ шаардлагад тулгуурлаж, онцлогийг нь харгалзан бүтээсэн жишиг контент юм.

2020 оны есдүгээр сараас эхэлсэн уг төсөл амжилттай хэрэгжиж econtent.edu.mn сайтад байршуулсан 104 интерактив жишиг хичээлийг өдгөө сургуулийн өмнөх болон ерөнхий боловсролын сургуулийн насны хүүхэд багачууд үзэж, сонирхолтой аргаар мэдлэгээ тэлж байна. 104 жишиг контентод сургуулийн өмнөх болон ерөнхий боловсролын 1-12-р ангийн бүх төрлийн интерактив хичээлүүд багтсан юм. 

НҮБ-ын “КОВИД-19 цар тахлын хүрээнд боловсролын салбарын суурь үйлчилгээг дэмжих" нэгдсэн төслийн хүрээнд хэрэгжсэн уг төслийн хаалтын арга хэмжээг 2021 оны дөрөвдүгээр сард зохион байгуулж хүүхэд багачуудын боловсролд хувь нэмрээ оруулахаар зориулан бүтээсэн уг ажлынхаа ололт амжилтыг талууд дүгнэн хэлэлцэх юм.